Reshjet e 24 orëve të fundit në territorin e qarkut të Gjirokastrës, të cilat ende vijojnë, nuk kanë shkaktuar problematika madhore.
Lumenjtë Vjosa, Drino dhe degët që furnizojnë këta lumenj janë brenda shtretërve të tyre.
Reshjet e shumta gjatë 12 orëve kanë krijuar probleme për sa i përket akseve rrugore rurale Tepelenë–Kurvelesh–Vlorë, ndërsa afër fshatit Bënçë ka pasur rënie inertesh dhe pemësh.
"Ditët e fundit kemi pasur kryesisht probleme në lidhje me rrëshqitjet në trupin e rrugës dhe të skarpateve të rrugës, si dhe probleme të vogla nga rrëketë e ujit. Nuk kemi pasur asnjë bllokim të akseve rrugore nacionale në qarkun e Gjirokastrës, por problematika të vogla, pastrimet e të cilave janë realizuar nga firmat kontraktore. Në aksin Kardhiq–Delvinë, si rezultat i projektit që po aplikohet për mbrojtjen e skarpateve të rrugës, është minimizuar shumë problemi i dherave nga vitet e kaluara," shprehet inxhinieri i ARRSH-së, Aristotel Noni.
Furnizimi me energji elektrike dhe ujë të pijshëm në këtë qark vijon normalisht dhe pa probleme.
Gazetare: Enkeleda Domeri
/rtsh.al/
