Prokuroria e Posaçme Kundër Korrupsionit dhe Krimit të Organizuar ka detajuar aksionin që çoi në arrestimin e sekretares së përgjithshme të ministrisë së Shëndetësisë, Joana Duro dhe specialistes në zyrën e prokurorimeve Laura Sheto.
Mësohet se Duro ka marrë 330 mijë lekë për të favorizuar një operator ekonomik në një tender të “Supervizimit për rikonstruksionin e disa Qendrave Shëndetësore në qarqet Tiranë e Durrës”.
Përgjatë hetimit u grumbulluan prova se një operator ekonomik do të jepte ryshfet me qëllim shpalljen fitues në një procedure prokurimi të zhvilluar nga Ministria e Shëndetësisë e Mbrojtjes Sociale (në cilësinë e Autoritetit Kontraktor).
Prokurimi në fjalë ishte me objekt “Lot 1 “Supervizim për rikonstruksionin e disa Qendrave Shëndetësore në qarqet Tiranë e Durrës”.
SPAK vijon më tej kur thotë se hetimet krijuan dyshimin se Joana Duro me detyrë Sekretare e Përgjithshme e Ministrisë së Shëndetësisë e Mbrojtjes Sociale ka marrë një përfitim të parregullt në shumën prej 330.000 (treqind e tridhjetë mijë) lekë, për të favorizuar Operatorin Ekonomik.
Këto para iu dhanë nga Specialiste e Nivelit të Lartë në Agjencinë e Ofrimit të Shërbimeve Publike të Integruara, Laura Sheto.
Arrestimi i tyre u bë në flagrancë, ndërsa në zyrën e sekretares së Përgjithshme u bë dhe sekuestrimi I vlerës monetare dhënë në formën e ryshfetit.
Mbi dy të arrestuarat rëndojnë akuzat “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Korrupsioni aktiv i funksionarëve të lartë shtetërorë ose të zgjedhurve vendorë”.
/rtsh.al/
