Ministria e Punëve të Jashtme greke ka reaguar ndaj vendimit të GJKKO e cila ka lënë në fuqi vendimin e shkallës së parë, duke dënuar me 2 vite burg Fredi Belerin, i zgjedhur kryebashkiak i Himarës në zgjedhjet e 2023.
Sipas reagimit të bërë publike në mediet greke, ministria ka ngritur shqetësime për nivelin e sundimit të ligjit dhe mbrojtjen e minoriteteve në Shqipëri.
“Vendimi i sotëm i Gjykatës së Apelit të Tiranës vjen për të përforcuar shqetësimet për nivelin e shtetit ligjor dhe mbrojtjen e minoriteteve në Shqipëri”, theksohet ndër të tjera në njoftimin e lëshuar nga Athina.
Sipas të njëjtit reagim thuhet “Beleri nuk është vetëm kryetar i zgjedhur i Bashkisë së Himarës. Ai është gjithashtu anëtar i zgjedhur i Parlamentit Evropian. Është, pra, detyrim i autoriteteve shqiptare që të marrin të gjitha masat e nevojshme për t’i dhënë mundësinë atij të marrë pjesë në punimet e Parlamentit Europian, duke filluar nga mandati i tij, korrikun e ardhshëm”, thuhet në njoftimin e ministrisë greke.
Ministria e Punëve të Jashtme shpreh shqetësimin e saj teksa shprehet ndër të tjera “për cenimin e prezumimit të pafajësisë, provave të paraqitura dhe zbritjen e dënimit të tij”.
“Të marrin të gjitha masat e nevojshme për t'i dhënë mundësinë atij të marrë pjesë në punimet e Parlamentit Europian” kërkohet në deklaratën e lëshuar nga Ministria e jashtme Greke.
