Presidenti i Këshillit Evropian Charles Michel po përfundon mandatin e tij pesëvjeçar si kryetar i organit të BE-së.
Në një intervistë me European Newsroom (enr), ku Agjencia Telegrafike Shqiptare është anëtare me të drejta të plota, ish-kryeministri belg 48-vjeçar theksoi nevojën për inovacion, vendosjen e objektivave ambiciozë dhe ruajtjen e unitetit të brendshëm të BE-së.
Presidenti i Këshillit Evropian Charles Michel bëri thirrje për përshpejtimin e procesit të zgjerimit të Bashkimit Evropian, duke theksuar nevojën strategjike për integrimin e vendeve të Ballkanit Perëndimor, Ukrainës dhe vendeve të tjera kandidate në familjen evropiane.
Michel theksoi se BE-ja duhet të përgatitet për zgjerimin e ardhshëm përmes reformave të brendshme, duke ruajtur momentin për anëtarësimin e vendeve kandidate, të cilat kanë gjithashtu punë të rëndësishme përpara.
Ai theksoi se ngjarjet e fundit gjeopolitike, duke përfshirë luftën në Ukrainë dhe sfidat në Ballkanin Perëndimor, e bëjnë reagimin e shpejtë të BE-së edhe më kritike.
Sipas Michel, BE po punon për një axhendë strategjike për t’u përgatitur më mirë për zgjerimin.
Kjo përfshin adresimin e implikimeve financiare dhe përshtatjen e proceseve të vendimmarrjes për të mbajtur Bashkimin efektiv me një numër më të madh anëtarësh.
”Sa më gjatë që BE-ja vonon zgjerimin”, paralajmëroi Michel, ”aq më gjatë mbahen të hapura dyert për të tjerët për të shfrytëzuar këtë pavendosmëri”.
”Për të arritur objektivin e integrimit të anëtarëve të rinj në Bashkimin Evropian deri në vitin 2030, BE-ja duhet të balancojë reformat e brendshme me nevojën për të mbështetur përparimin e vendeve kandidate”, tha Presidenti i Këshillit Evropian Charles Michel.
Ai tha se sot ka një unitet më të madh në Bashkimin Evropian për çështjen e migracionit sesa ka pasur disa vite më parë.
Michel beson se pika kyçe në menaxhimin dhe përballimin e krizave dhe sfidave të sotme është që të përqendrohen të gjitha përpjekjet në ruajtjen e mbështetjes së qytetarëve të BE-së – duke përmendur çështje të tilla si zgjerimi i BE-së dhe lufta ruse në Ukrainë si shembuj.
Presidenti në largim i Këshillit Evropian theksoi gjithashtu rëndësinë e forcimit të aftësive evropiane të mbrojtjes në dritën e zgjedhjeve presidenciale në SHBA, në të cilat zëvendëspresidentja aktuale demokrate Kamala Harris dhe ish-presidenti republikan Donald Trump do të konkurrojnë më 5 nëntor.
/ rtsh.al /
