Presidentja e Komisionit Evropian (KE), Ursula von der Leyen, tha të premten në Sarajevë se Bosnjë e Hercegovina ka treguar shumë herë në të kaluarën se mund të arrijë rezultate në rrugën drejt Bashkimit Evropian (BE) kur vepron e bashkuar.
Në kuadër të vizitës së saj në BeH, Von der Leyen zhvilloi takim me kryesuesen e Këshillit të Ministrave të Bosnjë e Hercegovinës, Borjana Krishto, ndërsa para kësaj u takua edhe me anëtarët e Presidencës së BeH-së.
Pasditen e së enjtes ajo vizitoi Jabllanicën, e cila ka pësuar më së shumti nga përmbytjet dhe rrëshqitjet e fundit të dheut.
Presidentja e KE-së shprehu edhe një herë ngushëllimet e saj për familjarët e viktimave të përmbytjeve të fundit në BeH.
Ajo vuri në dukje se BE-ja do të konsiderojë gjithashtu dhënien e ndihmës për BeH-në nga Fondi i Solidaritetit, i cili është në dispozicion të vendeve anëtare në rast të fatkeqësive natyrore.
Von der Leyen shprehu mirënjohjen për angazhimin e BeH-së në rrugën evropiane.
Von der Leyen theksoi se është shumë e rëndësishme që Bosnjë e Hercegovina të veprojë e bashkuar që të mund të zbatojë reformat në mënyrë më efikase dhe të arrijë rezultate në rrugën evropiane.
Ajo tha se çështja e zgjerimit të BE-së do të jetë prioritet absolut gjatë mandatit të saj të dytë.
Më pas Von der Leyen theksoi rëndësinë e dy nismave, Planit të Rritjes për Ballkanin Perëndimor dhe Planit të Investimeve për Ballkanin Perëndimor.
/ rtsh.al /