Ministri i Financave dhe Ekonomisë Ervin Mete në fjalën e tij në konferencën e organizuar nga AMF, në bashkëpunim me ministrinë që ai drejton dhe Bankën Botërore u ndal te zhvillimi i sektorit të sigurimeve, e mundësitë dhe sfidat në Evropën Juglindore.
Mete u shpreh se tërmeti nxori në pah një aspekt shumë të rëndësishëm se sigurimi vullnetar i banesave është në nivele të ulëta dhe në pjesën më të madhe, sipas tij, i diktuar nga bankat për kreditë hipotekore.
Mete theksoi se është i domosdoshëm përcaktimi i mekanizmave të mbrojtjes dhe transferimit të rrezikut ndërsa shtoi se po merren në shqyrtim opsionet për zhvillimin e një programi kombëtar për sigurimin nga tërmetet.
“Në vitin 2025 mbledhja vjetore e të gjithë mbikëqyrësve të sigurimeve në botë, do bëhet në Shqipëri. Është shenjë vlerësimi e bashkëpunimit ekselent që AMF ka pasur me IAC.
Një vlerësim i lartë për Shqipërinë dhe rajonin që një takim i bërë në Siatëll vjen e bëhet në Tiranë.
Tërmeti nxori në pah një aspekt të rëndësishëm se sigurimi vullnetar i banesave është në nivele të ulëta dhe në pjesën më të madhe është i diktuar nga bankat për kreditë hipotekore.
Nisur nga sa më sipër vlerësohet i domosdoshëm përcaktimi i mekanizmave të mbrojtjes dhe transferimit të rrezikut.
Ndaj me mbështetjen e Bankës Botërore, po shqyrtojmë opsionet më të mira për zhvillimin e një programi kombëtar për sigurimin nga tërmetet.
Është e rëndësishme që ky sigurim të jetë me kosto të përballueshme nga qytetarët dhe të bazohet në standartet më të mira të sigurimit të rrezikut”, u shpreh Mete.
Ministri u ndal gjithashtu edhe te bujqësia, që sikurse tha ai, sigurimi i këtij sektori mund të jetë mjet i rëndësishëm i menaxhimit të rrezikut që ndihmon fermerët nga humbjet financiare për shkak të fatkeqësive natyrore dhe kushteve klimatike.
“Rezulton në një masë të madhe të ekspozuar ndaj ndryshimeve të klimës. Sigurimi i bujqësisë mund të ishte një mjet i rëndësishëm i menaxhimit të rrezikut që ndihmon fermerët nga humbjet financiare për shkak të fatkeqësive natyrore dhe kushteve klimatike.
Ky sigurim është pak i zhvilluar në Shqipëri ndaj ndarja e eksperiencave më të mira në këtë drejtim do të jetë e dobishme për një avancim sa më të mirëmenduar lidhur me këtë çështje.
Zhvillimi i sektorit të sigurimeve, avancimi drejt standardeve më të mira ndërkombëtare dhe harmonizimi i kuadrit rregullator me direktivat europiane, janë procese që kërkojnë angazhim të përbashkët të të gjithë aktorëve, ndaj Ministria e Financave dhe Ekonomisë do jetë mbështetëse për të gjitha përpjekjet dhe iniciativat e sektorit dhe AMF-së në avancimin në këtë drejtim”, tha Mete.
/rtsh.al/
