Çmimet globale të naftës janë rritur në ditët e fundit pasi konflikti në Lindjen e Mesme ka arritur në maja. Ato mund të rriten edhe më tej nëse lufta e zgjeruar e Izraelit përfshin ngushticën jetike të Hormuzit në brigjet jugore të Iranit.
Rruga e hollë ujore - vetëm 21 milje (34 kilometra) e gjerë në pikën e saj më të ngushtë - është "pika më e rëndësishme e tranzitit të naftës në botë", sipas Administratës së Informacionit të Energjisë në SHBA.
Rreth një e pesta e tregtisë globale të naftës në botë kalon përmes ngushticës çdo ditë, thotë Simone Tagliapietra, një bashkëpunëtore e lartë në institutin e mendimit Bruegel me qendër në Bruksel.
Ngushtica përbën rreth një të katërtën e tregtisë ditore në botë të gazit natyror të lëngshëm. Ndërsa konflikti në Lindjen e Mesme përshkallëzohet, rritet edhe rreziku i ndërprerjes së rrjedhës së naftës përmes ngushticës - apo edhe një ndalesë e plotë.
Javën e kaluar, Irani lëshoi një breshëri raketash në drejtim të Izraelit, si hakmarrje për vrasjen e Hassan Nasrallah nga Izraeli, udhëheqësi i Hezbollahut, një grup militant i mbështetur nga Irani me bazë në Liban, si dhe të tjerë. Ministri i Mbrojtjes i Izraelit, Yoav Gallant, i tha CNN të dielën se vendi po përgatitej të sulmonte Iranin dhe se "gjithçka është në tryezë".
Tagliapietra e përshkroi situatën e brishtë si "shumë serioze", duke shtuar se çdo rritje e tensioneve që përfshin ngushticën e Hormuzit mund të ketë pasoja të ngjashme me goditjen e naftës të viteve 1970, kur çmimi i naftës shkoi shumë lart.
/rtsh.al/
