Në ndryshim nga Grupi Parlamentar, që kërkuan riorganizmin të PD-së, por duke nisur nga baza, Kolegji i Kryetarëve kërkojnë "pa asnjë vonesë" zgjedhjen e kryetari të ri.
Në një deklaratë të shpërndarë për mediat, pas mbledhjes së zhvilluar këtë të hënë (05 qershor), Kolegji i Kryetarëve të PD-së argumentojnë se çdo vonesë është në dëm të partisë, ndërsa kërkojnë që procesi për zgjedhjen e kryedemokratit të përfundojë brenda datës 15 korrik 2023.
"Partia Demokratike duhet pa asnjë vonesë të zgjedhë kryetarin e saj dhe të nisë organizimin dhe përzgjedhjen, të ekipeve që do ta drejtojnë këtë parti drejt zgjedhjeve të ardhshme. Partia Demokratike nuk mund të vazhdojë të qëndrojë më gjatë pa kryetar. PD ka humbur kohë në pritje, ndërkohë që nuk ka asnjë reflektim nga pala tjetër, as pas rezultatit të zgjedhjeve të 14 majit. Procesi për zgjedhjen e kryetarit të përfundojë brenda datës 15 Korrik 2023. Nëse vazhdojmë të rrimë në pritje, atëherë kjo i shërben vetëm projektit te kundërshtarëve tanë politikë", thuhet mes të tjerash në deklaratë.
Ndërkohë, në mbledhjen e zhvilluar po këtë të hënë, Grupi Parlamentar i PD-së doli me një platformë me 5 pika, me qëllim, sipas tyre, forcimin e partisë. Ata kërkojnë fillimisht nisjen e procesit të zgjedhjeve në nivel seksioni, grupseksioni dhe dege dhe më pas procesin e zgjedhjes së kryetarit të partisë.
Deklaratë e plotë Kolegjit të Kryetarëve të Partisë Demokratike
Partia Demokratike që prej marsit 2022 ka bërë përpjekje të vazhdueshme, por pa rezultat për bashkimin e demokratëve,
- dorëheqja e kryetarit më qëllim për ti hapur rrugë t'i hapur rrugë bashkimit, gjë që nuk ndodhi,
- kërkesa për organizimin e zgjedhjeve të përbashkëta të cilat u refuzuan,
- kërkesa për përzgjedhjen e kandidatëve në zgjedhjet e 14 majit që u refuzua dhe u vazhdua me procese të njëanshme,
- propozimin për daljen me një kandidat të përbashkët për zgjedhjet vendore të 14 majit duke pranuar kandidatët e primareve
Të gjitha këto përpjekje u refuzuan.
Eshtë humbur një vit në pritje të bashkimit, por pa rezultat dhe kjo ka ndikuar në dëmtimin dhe dobësimin e Partisë Demokratike.
Drejtuesit e Partisë Demokratike nga seksionet, grupseksionet, kryetarët e degëve kanë punuar me vetmohim për të mos lejuar asimilimin Partisë Demokratike apo asgjesimin e saj.
Ne jemi të vendosur që Partia Demokratike të vazhdojë të jetë një parti aleate e SHBA, Britanise se Madhe dhe BE, të shndërrohet në një alternativë dhe shpresē për shqiptarët në zgjedhjet e përgjithshme të vitit 2025.
Për këto arsye, çdo ditë e humbur nuk i shërben as Partisë Demokratike, as demokratëve.
Partia Demokratike duhet pa asnjë vonesë të zgjedhë kryetarin e saj dhe të nisë organizimin dhe përzgjedhjen, të ekipeve që do ta drejtojnë këtë parti drejt zgjedhjeve të ardhshme.
Partia Demokratike nuk mund të vazhdojë të qëndrojë më gjatë pa kryetar. PD ka humbur kohë në pritje, ndërkohë që nuk ka asnjë reflektim nga pala tjetër, as pas rezultatit të zgjedhjeve të 14 majit.
Procesi për zgjedhjen e kryetarit të pëfundojë brenda datës 15 Korrik 2023.
Nëse vazhdojmë të rrimë në pritje, ateherë kjo i shërben vetem projektit te kundërshtarëve tanë politikë.
Nuk duhet humbur më asnjë ditë kohë për organizimin e PD, zgjedhjen e drejtuesve dhe shndërrimit të Partisë Demokratike në forcën politike që kërkojnë sot shqiptarët.
