Ismail Kadare, shkrimtari më i madh i letërsisë shqipe dhe autori më i përkthyer jashtë vendit në mbi 45 gjuhë të botës padyshim zë vend edhe në programet shkollore.
Mësuesja e letërsisë Oderina Ndreu ndërsa tregon veprat me të cilat ai është i pranishëm mes nxënësve shprehet se krijimtaria e tij është e njohur nga të rinjtë gjimnazistë.
“Në të gjitha ciklet e arsimit zhvillojmë orë ku Kadareja përfaqësohet me “Kronikë në gur” apo “Kush e solli Doruntinën”, tha mësuesja.
Aktivitetet kushtuar kësaj figure të papërsëritshme të letërsisë shqiptare janë pjesë e kalendarit të përvitshëm kulturor që harton Gjirokastra.
Por organizimet nuk mungojnë as nga institucionet arsimore. Gjimnazi “Asim Zeneli”, shkolla ku Kadare zhvilloi studimet e mesme i ka dhënë hapësirën që meriton duke e sjellë në vendlindje përmes krijimtarisë së tij.
“Ne kemi fatin të ecim në gjurmën e Kadaresë apo Agollit, të atyre që bënë historinë në Shqipëri dhe në botë. Vepra e Kadaresë përfaqësohet denjësisht në të gjitha veprimtaritë shkollore” shtoi mësuesja.
Kadare zë një vend të veçantë dhe në programet e studimit që ofron universiteti “Eqrem Cabej” në fushën e mësimdhënies. Vepra e tij studiohet nga të rinjtë që ndjekin degët cikël i ulët dhe gjuhë e letërsi, në të dyja ciklet e studimit.
/rtsh.al/
