Mjeku neurolog Drini Dobi ndërroi jetë në një spital në Itali, ku po kurohej për COVID-19.
Ministrja e Shëndetësisë dhe Mbrojtjes Sociale, Ogerta Manastirliu shprehu dhimbjen e madhe, siç u shpreh ajo, në këto momente kaq të hidhura për të gjithë.
“Jam tej mase e pikëlluar për ndarjen nga jeta të një miku të mirë dhe një profesionisti të shkëlqyer, doktor Drini Dobit”, tha ajo.
Manastirliu tha se “kishim shpresuar shumë, deri në çastet e fundit, se Doktor Drini do t’ia dilte ta fitonte këtë betejë për jetën, ashtu siç ia kishte dalë me mijëra herë të fitonte betejat për pacientët e tij”.
“Dhimbja është e madhe në këto momente kaq të hidhura për të gjithë. Jam pranë Floridës, familjes dhe kolegëve të Doktor Drinit në këto momente. U prehsh në paqe Doktor Drini!”, tha Manastirliu.
Për lajmin e vdekjes së mjekut të njohur, reagoi edhe Universiteti i Mjekësisë i Tiranës.
