Krahu i armatosur i Hamasit thotë se do të vonojë lirimin e më shumë pengjeve izraelitë "deri në një njoftim tjetër". Tre pengje do të liroheshin të shtunën.
“Gjatë tre javëve të fundit, udhëheqja e rezistencës ka monitoruar shkeljet e armikut dhe mosrespektimin e kushteve të marrëveshjes. Këto shkelje përfshijnë vonimin e kthimit të personave të zhvendosur në Gazën veriore, shënjestrimin e tyre me bombardime dhe të shtëna me armë në zona të ndryshme të Rripit dhe dështimin për të lejuar hyrjen e ndihmës humanitare në të gjitha format e saj të dakorduara. Ndërkohë, rezistenca ka respektuar plotësisht angazhimet e saj. Për rrjedhojë, lirimi i të burgosurve sionistë, i planifikuar për të shtunën, më 15 shkurt 2025, do të shtyhet deri në një njoftim tjetër, në pritje të përmbushjes së armikut dhe përmbushjes retroaktive të detyrimeve të javëve të kaluara. Ne riafirmojmë angazhimin tonë ndaj kushteve të marrëveshjes për sa kohë që okupimi i përmbahet atyre.", thuhet në deklaratën e Hamasit.
Lirimi i radhës i pengjeve izraelite ishte parashikuar të bëhej të shtunën. Ata janë marrë peng në sulmet e 7 tetorit 2023. Në këmbim, Izraeli do të kishte liruar një numër të burgosurish palestinezë nga burgjet izraelite, si pjesë e marrëveshjes së armëpushimit që filloi muajin e kaluar. Që atëherë, shkëmbime të tilla janë bërë rregullisht.
Izraeli thotë se është i përgatitur 'për çdo skenar në Gaza'
Izraeli i është përgjigjur vendimit të Hamasit për të pezulluar lirimin e pengjeve. Një deklaratë e Ministrit të Mbrojtjes, Israel Katz, thotë:
“Njoftimi i Hamasit për të ndaluar lirimin e pengjeve izraelitë është një shkelje e plotë e marrëveshjes së armëpushimit dhe marrëveshjes për lirimin e pengjeve. Kam udhëzuar IDF-në që të përgatitet në nivelin më të lartë të gatishmërisë për çdo skenar të mundshëm në Gaza dhe të mbrojë komunitetet. Nuk do të lejojmë kthimin në realitetin e 7 tetorit”.,
Faza e parë e marrëveshjes së armëpushimit midis Izraelit dhe Hamasit ka dhënë rezultate pozitive: 21 pengje (16 izraelitë dhe pesë shtetas tajlandezë) u liruan nga Gaza në këmbim të më shumë se 500 të burgosurve palestinezë nga burgjet izraelite.
Këto zhvillime pasqyrojnë tensionet në rritje ndërsa po bëhen përpjekje për të shtrirë armëpushimin e brishtë në një fazë të dytë.
Qeveria izraelite ishte e zemëruar me gjendjen e dobësuar të tre pengjeve të fundit që u liruan.
Nga ana e tij, ky njoftim i Hamasit mund të jetë një mënyrë për t'iu përgjigjur propozimeve të diskutueshme të presidentit amerikan Donald Trump për të ardhmen e Gazës. BBC
/rtsh.al/
