Gjykatësi Carl Nichols ka bllokuar përkohësisht një urdhër të administratës Trump për të vendosur 2200 punonjës të Agjencisë Amerikane për Zhvillim Ndërkombëtar (USAID) në pushim administrativ me pagesë. Urdhri, i cili pritej të hynte në fuqi natën e premte, ishte ndërmarrë si pjesë e përpjekjeve të Presidentit Trump për të ulur shpenzimet qeveritare.
Gjykatësi Nichols lëshoi një urdhër ndalimi të përkohshëm, duke thënë se masat e propozuara do të shkaktonin "dëm të pariparueshëm" për punonjësit, ndërsa nuk do të kishte ndikim të madh për qeverinë. Urdhri i gjykatës do të mbetet në fuqi deri më 14 shkurt, kur do të shqyrtohet kërkesa për një pauzë afatgjatë.
"Të gjithë punonjësit e USAID-it aktualisht në pushim administrativ do të rikthehen në punë deri në atë datë dhe do t'u jepet akses i plotë në sistemet e njoftimeve të postës elektronike, pagesave dhe sigurisë deri në atë datë, dhe asnjë punonjës shtesë nuk do të vendoset në pushim administrativ para asaj date", tha Nichols.
Administrata Trump argumenton se reduktimi i stafit të USAID është pjesë e përpjekjeve të saj për të çmontuar agjencitë që konsiderohen të panevojshme dhe për të ulur buxhetin federal. USAID është agjencia kryesore e ndihmës ndërkombëtare dhe shumica e stafit të saj punon jashtë shtetit, duke ofruar mbështetje në fushat e shëndetit dhe zhvillimit.
Për momentin, punonjësit që ishin të vendosur në pushim administrativ do të kthehen në detyrë, ndërsa gjykata do të shqyrtojë më tej kërkesën e administratës në seancën e ardhshme.
/rtsh.al/
