Viti 2021 konsiderohet si viti i korrigjimit në ekonomi. Dhe kështu po ndodh. Në kushtet e një veprimtarie ekonomike në rritje, kursi i këmbimit EUR/ALL po ndikon lirisht rrjedhën e logjikës ekonomike, atë që cilësohet si baraspeshim i kërkesës dhe ofertës.
Sipas ekspertëve, rigjallërimi i aktivitetit ekonomik mund të ketë ndikim të përkohshëm nga rritja e importeve krahasuar me 2020-n. Karburantet përshembull shënojnë rekordin e rradhës në periudhën janar-qershor 2000-2021. Ka shumë faktorë që ndikojnë, por edhe kursi i këmbimit është njëri prej tyre.
Në 2020, kursi i këmbimit tregoi qëndrueshmëri, pavarësisht krizës së shkaktuar nga pandemia. Në javët e para të prekjes nga pandemia, Euro shënoi rritje të shpejtë, duke u forcuar me rreth 7% në më pak se dy javë, duke arritur nivelin më të lartë vjetor prej 131.06 lekësh. Por, ndërhyrja e shpejtë e Bankës së Shqipërisë e stabilizoi kursin brenda pak ditësh. Në vitet e fundit, kursi i këmbimit mes Euros dhe Lekut ka kaluar disa momente luhatjesh të forta, që janë stabilizuar vetëm me ndërhyrjen e Bankës së Shqipërisë. Kjo ka kuptim përsa kohë stoku i borxhit të jashtëm bruto të vendit (ku përfshihen të gjitha detyrimet e sektorit privat dhe publik ) u zgjerua me 3.7% gjatë vitit 2020 si rrjedhojë e rritjes së borxhit publik. Kosto e këtij borxhi ka varësi nga kursi i këmbimit valuator. Por ndërsa qeveria dhe importuesit përfitojnë nga kjo kosto e kursit të këmbimit, eksportuesit dhe rieksportuesit shesin më lirë duke dëmtuar financat e tyre, në kushtet kur veprimtaria e tyre ekonomike vijon të mbetet në dorë të pandemisë.
