Fluksi i lartë i qarkullimit të mjeteve për shkak të festave të fundvitit ka sjellë trafik të rënduar në rrugën Elbasan-Tiranë.
Policia Rrugore e Elbasanit, me anë të një njoftimi për media ka dhënë informacion në lidhje me punën që po bëjnë efektivët në terren për trafikun rrugor, të shkaktuar nga festat e fundvitit.
Efektivët e Rrugores në Elbasan deklarojnë se janë të gatishmëri 100 përqind. Policia Rrugore deklaron se po monitoron akset “Qafë thanë-Elbasan dhe “Rrogozhinë-Elbasan”.
Në njoftimin e bërë publik, thuhet se, “shërbimet e Policisë Rrugore kanë rritur gatishmërinë 100% në terren, si dhe kanë shtuar vigjilencën, me qëllim menaxhimin e trafikut, për shkak të fluksit të mjeteve që kthehen në drejtim të Tiranës, si edhe ata që lëvizin në drejtim të Korçës dhe bregdetit, kryesisht në akset “Qafë thanë-Elbasan dhe “Rrogozhinë-Elbasan”.
Gjithashtu, në terren, në mbështetje të Policisë Rrugore janë të angazhuar edhe shërbimet e Rendit Publik dhe ato të forcës Shqiponja të DVP Elbasan, për sigurinë rrugore dhe për të garantuar se nuk do të ketë bllokim të lëvizjes.
“Drejtuesit e automjeteve të moderojnë shpejtësinë, të tregojnë durim, të qëndrojnë në radhë dhe të mos kryejnë parakalime të gabuara, që të mos kthehen në burim për aksidente rrugore apo për bllokim të lëvizjes.
Qytetarët të respektojnë me rigorozitet rregullat e qarkullimit rrugor dhe të ndjekin udhëzimet e shërbimeve të Policisë”-thuhet në njoftim.
Gjithashtu qytetarët ftohen që të denoncojnë në numrin pa pagesë 112, çdo shkelje të rregullave të qarkullimit rrugor”, njofton Policia Rrugore.
/rtsh.al/
