Pas një rrugëtimi 3-ditor të mbushur me interpretime energjike dhe shpirt artistik, mbrëmjen e sotme do të mbahet dhe nata finale e Festivalit të Këngës për shpalljen e fituesit, që do të përfaqësojë Shqipërinë në Eurovision 2025.
15 finalistët që garojnë për çmimin e parë janë të mbushur me emocione dhe shpresë. Do të ketë edhe çmime vlerësuese për ata që kanë dhënë gjithçka për këtë festival, si "Çmimi i Kritikës" dhe ai për "Tekstin më të Mirë".
Pjesë e kësaj nate të paharrueshme do të jetë edhe i ftuari special, këngëtari i njohur nga Kosova, MC Kresha, nga i cili pritet një atmosferë e jashtëzakonshme me hitet e tij. Performanca do të jetë një shfaqje e vërtetë e energjisë dhe magjisë së muzikës, duke e bërë këtë natë edhe më speciale.
Kjo është një natë ku magjia e muzikës, emocioni i fortë dhe energjia e një shfaqjeje spektakolare do të bashkohen për ta bërë të paharrueshme për të gjithë ata që janë pjesë e Festivalit të Këngës.
Risi e këtij viti është diaspora, që për herë të parë do të ketë zërin e vet në zgjedhjen e këngës fituese. Të gjithë shqiptarët që jetojnë jashtë mund të votojnë përmes faqes zyrtare të RTSH-së, festivali.rtsh.al. Votimi është i mundur vetëm për shqiptarët që ndodhen jashtë vendit, ndërsa qytetarët shqiptarë brenda Shqipërisë dhe në Kosovë mund të votojnë përmes SMS-ve: nga Shqipëria në numrin 56789 dhe nga Kosova në numrin 55789.
Votat e diasporës do të bashkohen me ato të publikut brenda vendit dhe në Kosovë për të përllogaritur rezultatin final, i cili do të përfshijë edhe vlerësimin e jurisë profesioniste të Festivalit të Këngës.
Këngëtarët dhe titujt e këngëve që konkurrojnë në finale:
Kodi 01 Jet – Gjallë
Kodi 02 Kejsi Jazxhi – Kur bota hesht
Kodi 03 Vesa Smolica – Lutem
Kodi 04 Stine – E kishim nis'
Kodi 05 Djemë e Detit – Larg
Kodi 06 Nita Latifi – Zemrës
Kodi 07 Gjergj Kaçinari – Larg jetës pa ty
Kodi 08 Orgesa Zaimi – I parë
Kodi 09 Ardit Çuni – Amane
Kodi 10 Algert Sala – Bosh
Kodi 11 Shkodra Elektronike – Zjerm
Kodi 12 Lorenc Hasrama – Frymë
Kodi 13 Elvana Gjata – Karnaval
Kodi 14 Mal – Antihero
Kodi 15 Alis – Mjegull
/rtsh.al/
