Presidenti i Bullgarisë Rumen Radev njoftoi të enjten se zgjedhjet e parakohshme parlamentare do të mbahen më 2 prill pasi Partia Socialiste nuk arriti të formojë një qeveri në vend, e cila do të mbajë zgjedhjet e saj të pesta në vetëm dy vjet, njofton News 360.
Kështu, Radev ka bërë të ditur se Kuvendi Popullor do të shpërndahet nga kjo e premte dhe ka paralajmëruar zyrtarisht shpalljen e këtyre zgjedhjeve, me të cilat shpreson të tejkalohet ngërçi politik.
Përbërja e qeverisë së përkohshme, e cila do të ketë vetëm një ndryshim në raport me atë aktuale, pritet të shpallet këtë javë, shkruan gazeta "Dnevnik". Thirrja vjen pas tre përpjekjeve për të formuar një qeveri, e para nga Qytetarët për Zhvillim Evropian të Bullgarisë (GERB), të ish-kryeministrit Boiko Borisov dhe e dyta nga partia bullgare Të vazhdojmë ndryshimin, të ish-kryeministrit Kiril Petkov. E treta, e fundit, ishte në duart e socialistes Kornelia Ninova, e cila gjithashtu nuk arriti të merrte mbështetjen e duhur.
Kështu, kryeministri aktual Galab Donev do të qëndrojë në krye të Ekzekutivit në mënyrë të përkohshme deri në mbajtjen e zgjedhjeve. Ministri i Kulturës Velislav Minekov do të jetë i vetmi që do të largohet nga posti dhe do të zëvendësohet nga Najden Todorov.
Zgjedhjet e reja do të zgjasin më tej krizën institucionale në vend dhe do të vonojnë sërish aksesin e Sofjes në fondet e rimëkëmbjes së Bashkimit Evropian, si dhe përpjekjet e saj për t'u bashkuar me eurozonën.
