Blerjet online përmes rrjeteve sociale po rriten gjithnjë e më shumë në tregun shqiptar, por njësoheshit po rriten dhe ankesat e konsumatorëve lidhur me shërbimin dhe produktin që ata marrin.
Nën shumicën e rasteve faqet e online, kryesisht që veprojnë përmes platformave Facebook dhe Instagram nuk u japin zgjidhje problemeve të konsumatorëve, dhe në këtë rast ndërhynë Agjencia e Mbrojtjes së Konsumatorëve.
Në një intervistë për RTSH 24, Blerina Harizaj dhe Gerta Dhima kanë treguar të gjitha procedurat që duhen ndjekur nga ana e konsumatorit për të marrë zgjidhje lidhur me ankesën e tij.
“Në momentin që kemi një ankesë ai duhet t’i drejtohet Agjencisë së Konsumatorit dhe më pas plotësohet fizikisht një formular ku kërkohen të dhënat për produktin dhe të tjera specifika. Në rrjetet sociale kemi shumë ankesa që na vijnë çdo ditë”, tha Dhima
“Brenda 14 ditëve konsumatorit duhet të raportojë problemin, ku biznesi duhet t të bëjë kthimin apo rimbursimin e produktit, në të kundërt pas këtij afati nuk merren më parasysh ankesat. Shqiptarët blejnë shumë online duke marrë parasysh rastin e numrit të ankesave të zgjidhura ku me Agjencinë tonë kanë një derë ku të drejtohen”, tha Harizaj.
Ekspertet kanë këshilluar gjithashtu konsumatorët se si të identifikojnë faqet online jo të besuara dhe të mos bien pre e mashtrimeve.
“Në faqet online ku nuk lejohet ndërrimi dhe kthimi i produktit nuk është një faqe e besueshme. Faqja duhet të ketë të afishuar NIPT-in, numrin e telefonit, adresën, tarifën e transportit, mënyrën e pagesës, mënyrën e dorëzimit të mallit dhe përshkrim i detajuar i mallit. NIPT-i tregon se faqja është e licencuar dhe serioze”, tha Harizaj.
Agjencia e Konsumatorit zhvillon gjithashtu fushata ndërgjegjësimi të konsumatorit për t’u njohur dhe informuar mbi të drejtat e tyre kur blejnë online apo marrin një shërbim nga bizneset.
“Fokusi ynë është informimi i konsumatorit dhe sensibilizimin e tij. Me një afat 3 mujor kemi fushata sensibilizimi për të drejtat e konsumatorit dhe ndërgjegjësimin e tij se ku duhet të ankohet”, u shpreh Dhima.
Rrjete sociale kanë krijuar një treg të madh online në vend, por njëkohësisht kanë rritur edhe informalitetin. Abuzimet më të mëdha me klientin vijën pikërisht nga këto subjekte të pa licencuara.
/rtsh.al/
