Kreu i Partisë Demokratike, Sali Berisha, ka akuzua qeverinë për përdorimin e shtetit për manipulimin e zgjedhjeve dhe për kryerjen e krimeve elektorale.
Sipas Berishës, krimin shtetëror elektoral e kryeson zv.kryeministrja Belinda Balluku duke e cilësuar atë si një "monstër të shtetit elektoral" dhe duke akuzuar qeverinë për përdorim të dhunshëm të administratës shtetërore për të kontrolluar votën e qytetarëve.
Berisha shprehu shqetësimin se punonjësit e administratës veprojnë si "xhandarë elektoralë" dhe "terroristë elektoralë" thuajse në të gjithë vendin për të grabitur votën e qytetarëve. Si përgjigje ndaj kësaj, Berisha tha se do të ketë mosbindje civile ndaj këtij shteti elektoral dhe bëri thirrje për një fushatë elektorale të ndershme dhe të qetë.
“Në këtë periudhë është shfaqur me gjithë shëmtinë e tij shteti elektoral. Në këtë periudhë, Edi Rama është angazhuar në krime të mëdha elektorale. Krimin shtetëror elektoral e kryeson Lubi Balluku. E kryeson ky person, që në vjedhjet e saj tejkalon pas Edi Ramës çdo person tjetër në historinë e vendit. Kjo ka hapur zyrat në të gjithë Myzeqenë me punonjësit e ministrisë, të cilët ngulen aty si xhandarë elektoralë, si terroristë elektoralë. Përdorimi i shtetit elektoral për të dhunuar votën e shqiptarëve është një thirrje e brendshme për demokratët për mosbindje civile. Edi Rama nuk mund të grabisë kurrë këto zgjedhje. Ne jemi të përgatitur për një fushatë elektorale të ndershme, të qetë, të drejtë, të konkurrojmë me alternativë. Por në qoftë se ai shpalos shtetin elektoral, ne do shpalosim zemërimin e qytetarëve kundër shtetit elektoral. Lubi Loti është një monstër e shtetit elektoral”, tha Berisha.
Berisha gjithashtu nënvizoi se PD është e përgatitur për një transformim të thellë të vendit pas datës 11 maj, duke deklaruar se gjatë 100 ditëve të para të qeverisjes, do të realizohen reforma të mëdha në Shqipëri. Berisha theksoi se Shqipëria ka kaluar nën ndikimin e Xhorxh Sorosit dhe premtoi se PD do të ndërmarrë hapa për të "desorosizuar" shoqërinë shqiptare.
“Shqiptarët çdo ditë e më shumë janë të bindur se në pushtet me datën 11 maj do të jetë PD. Dhe, kjo është një përgjegjësi e madhe, por i garantoj me këtë rast se 100 ditët do jenë 100 ditët e transformimit rrënjësor të Shqipërisë. Koha nuk pret, ndaj duhet të përgatiten të gjitha vendimet e 100 ditëve të para gjatë këtyre muajve para fushatës, në mënyrë që ato të firmosen në përputhje me Kushtetutën, si vendime qeverie apo akte normative, për të bërë realitet programin tonë transformues të Shqipërisë. Në të gjithë përgatitjen tonë, është e domosdoshme një seri aktesh, vendimesh, të cilat sjellin desorosizimin e shpejtë të shoqërisë shqiptare. Është fakt i pamohueshëm se në botë, kopshti eksperimental i Xhorxh Sorosit u bë Shqipëria. Unë i bëra thirrje Aleksis Soros të mbyllë fondacionin në Shqipëri, sepse i jap fjalën, që javën e parë pas 11 majit do të mbyllet me dekret ligj që të mos shkelë më në Shqipëri. Ky fondacion i ka bërë të këqija të mëdha Shqipërisë”, tha Berisha.
Ndërkohë iniciativa e presidentit amerikan, Donald Trump, për të njohur vetëm dy gjini ndërmerret edhe nga PD-ja. Kryedemokrati tha se nisma ligjore synon sanksionimin e njohjes së dy gjinive të vetme dhe dënimin e kujtdo që konsideron Prindin 1 dhe 2.
"Ne kemi përgatitur një ligj në kuadrin e desorosizimit që dorëzojmë sot, me të cilin sanksionojmë se Republika e Shqipërisë njeh dy gjini, ato që i ka bërë Zoti, mashkull dhe femër. Në mënyrë që t’i japim fund çdo lloj tentative dhe përpjekje. Ligji tjetër me dënim ai që flet për Prindin 1 dhe Prindin 2. Do ketë sanksione," u shpreh Berisha.
/rtsh.al/
