Ministria e Shëndetësisë në Gazë ka bërë të ditur se se janë vrarë mbi 46 mijë palestinezë dhe mbi 109 mijë të tjerë kanë mbetur të plagosur që prej nisjes së konfliktit me Izraelin.
Sipas zyrtarëve në Gazë, gratë dhe fëmijët përbëjnë më shumë se gjysmën e viktimave, ndërsa nuk specifikohet se sa nga të vdekurit ishin luftëtarë apo civilë.
Ushtria izraelite nga ana e saj thotë se ka vrarë mbi 17 mijë militantë, por pa dhënë prova konkrete.
Sipas ushtrisë izraelite, ajo është përpjekur të shmangë dëmtimin e civilëve dhe fajëson Hamasin për vdekjet e tyre, sepse militantët veprojnë në zona të banuara.
Izraeli gjithashtu ka goditur në mënyrë të përsëritur atë që pretendon se janë militantë të fshehur në strehimore dhe spitale, duke vrarë shpesh gra dhe fëmijë.
Javët e fundit, Izraeli dhe Hamasi janë dukur se po i afrohen një marrëveshjeje për një armëpushim dhe lirimin e pengjeve.
Sekretari i Shtetit Antony Blinken tha këtë marrëveshja është "shumë afër" dhe ai shpreson ta përfundojë atë përpara se t'ia dorëzojë diplomacinë amerikane administratës së ardhshme të Donald Trump.
Por ai dhe zyrtarë të tjerë amerikanë kanë shprehur optimizëm të ngjashëm në disa raste gjatë vitit të kaluar, vetëm për të parë ngecjen e bisedimeve indirekte.
Lufta filloi kur militantët e udhëhequr nga Hamasi hynë në Izrael më 7 tetor 2023, duke vrarë rreth 1200 njerëz, kryesisht civilë, dhe duke rrëmbyer rreth 250 të tjerë.
Rreth 100 pengje janë ende brenda Gazës. Autoritetet izraelite besojnë se të paktën një e treta e tyre janë vrarë në sulmin fillestar ose kanë vdekur në robëri.
Lufta ka rrafshuar zona të mëdha të Gazës dhe ka zhvendosur rreth 90% të 2.3 milionë banorëve të saj, me shumë të detyruar të largohen disa herë. Qindra mijëra janë të mbushur në kampe tendash të mëdha përgjatë bregdetit me akses të kufizuar në ushqim dhe gjëra të tjera thelbësore.
“Ajo që po jetojmë nuk është jetë. Askush nuk mund ta duronte situatën që po përjetojmë për një ditë të vetme. Ne zgjohemi natën me tingujt e burrave që qajnë, për shkak të situatës së keqe. Situata është e padurueshme. Ne nuk kemi më energji: ne duam që ajo të përfundojë sot”, tha në intervistë për Ap Munaëar al-Bik, një grua e zhvendosur nga Gaza.
Zyrtarët palestinezë të shëndetësisë thanë se sulmet ajrore izraelite vranë të paktën nëntë persona në Gaza të mërkurën, duke përfshirë tre foshnja - mes tyre një 1-javore - dhe dy gra.
/rtsh.al/
