Zëdhënësi i Kremlinit, Dmitry Peskov, ka thënë se Rusia është duke e monitoruar nga afër situatën, pasi presidenti i zgjedhur amerikan Donald Trump refuzoi të përjashtojë veprimin ushtarak për të marrë Groenlandën nga Danimarka.
Peskov tha se Arktiku ishte në "sferën e interesave kombëtare dhe strategjike të Rusisë dhe është i interesuar për paqen dhe stabilitetin atje".
Deklaratat e Trump mbi Groenlandën, një territor kryesisht autonom danez, kanë marrë një paralajmërim nga udhëheqësit evropianë.
Shefja e punëve të jashtme të BE-së, Kaja Kallas, ka theksuar se "duhet të respektojmë integritetin territorial dhe sovranitetin e Groenlandës", dhe kancelari gjerman Olaf Scholz e ka bërë të qartë se "kufijtë nuk duhet të lëvizin me forcë".
Trump tha në fillim të javës se SHBA-ja kishte nevojë si për Groenlandën, ashtu edhe për Kanalin e Panamasë "për sigurinë ekonomike", dhe refuzoi të përjashtonte përdorimin e forcës ekonomike ose ushtarake në marrjen e tyre.
Ai gjithashtu iu referua kufirit me Kanadanë si një "vijë e vizatuar artificialisht". Danimarka dhe Kanadaja janë të dyja aleatë të ngushtë të NATO-s.
Dmitri Peskov tha se pretendimet e Trump ishin një çështje për SHBA, Danimarkën dhe vende të tjera, por Rusia po shihte situatën "mjaft dramatike". "Ne jemi të pranishëm në zonën e Arktikut dhe do të vazhdojmë të jemi të pranishëm atje," tha ai. Sekretari amerikan i Shtetit në largim, Antony Blinken, kërkoi të zbehte shqetësimin për deklaratat e presidentit të zgjedhur gjatë një vizite në Paris ku tha: "Ideja është e qartë se nuk është e mirë, por ndoshta më e rëndësishme, është padyshim që nuk do të ndodhë."
Sekretari i Jashtëm i Mbretërisë së Bashkuar, David Lammy, gjithashtu i hodhi poshtë komentet e Trumpit, por ai pranoi se "intensiteti i retorikës së tij dhe paparashikueshmëria ndonjëherë e asaj që ai tha mund të jetë destabilizuese".
Rreth 56.000 vetë jetojnë në Groenlandë dhe ajo është shtëpia e bazave ushtarake të SHBA si dhe daneze. Ajo ka gjithashtu pasuri të konsiderueshme të pashfrytëzuara minerale dhe nafte.
Komisioni Evropian tha se kërcënimi i Trump ndaj Groenlandës ishte "jashtëzakonisht teorik" dhe " hipotetik", duke konsideruar se ai nuk ishte ende në detyrë.
/rtsh.al/
