Si pjesë e angazhimit të Ambasadës për reformën në drejtësi në Shqipëri, programi kundër terrorizmit i Zyrës së Ndihmës për Zhvillimin e Prokurorisë Jashtë Vendit (OPDAT), në bashkëpunim me Korpusin Vullnetar të Shërbimeve Financiare, organizuan këtë muaj një konferencë trajnimi financiar ku morën pjesë 30 analistë, hetues dhe prokurorë nga agjenci të ndryshme ligjzbatuese dhe prokurori shqiptare.
Përmes një njoftimi për shtyp, ambasada e SHBA-së në Tiranë bëri të ditur se Konferenca theksoi rëndësinë e bashkëpunimit ndërmjet institucioneve private dhe publike në luftën kundër krimeve financiare.
Prezantimet u bënë nga bizneset bankare dhe të shërbimeve të parasë në lidhje me shërbimet që ofrojnë, programet e tyre të pajtueshmërisë dhe bashkëpunimin e tyre me organet ligjzbatuese.
Gjatë zhvillimit të kësaj konference u diskutuan gjithashtu tendencat e kriptomonedhave, përfshirë vëllimin e transaksioneve me kriptomonedha në Shqipëri dhe hapat që hetuesit duhet të ndërmarrin për të identifikuar dhe shfrytëzuar përdorimin e "blockchain" nga ata që hetojnë.
Disa agjenci rregullatore, duke përfshirë Bankën Qendrore Shqiptare, Agjencinë e Hetimit Financiar dhe Shërbimin e të Ardhurave, bënë prezantime mbi të gjitha funksionet e tyre të pajtueshmërisë.
Më tej, ekspertët ndërkombëtarë të pajtueshmërisë prezantuan dhe moderuan panele duke ndarë përvojën e tyre prej dekadash.
Në përfundim të njoftimit thuhet se agjentët specialë nga Divizioni i Hetimit Penal i Shërbimit të të Ardhurave të Brendshme (IRS) drejtuan ushtrime stërvitore që kërkonin analiza të të ardhurave, shpenzimeve dhe deklaratave bankare të bizneseve kriminale hipotetike.
/rtsh.al/
