Ambasada e Shteteve të Bashkuara në Kosovë ka reaguar me moscertifikimin e Listës Serbe nga ana e Komisionit Qendror të Zgjedhjeve.
SHBA ka shprehur shqetësim të thellë për veprimet e disa anëtarëve të Komisionit Qendror të Zgjedhjeve (KQZ), të cilët nuk kanë certifikuar kandidatët e Listës Serbe.
“Veprime të tilla dëmtojnë parimet themelore demokratike të zgjedhjeve të lira dhe të ndershme, meqenëse ia çelin derën ndikimit subjektiv politik mbi procesin zgjedhor”, thekson Ambasada e SHBA-së.
Në përgjigjen e ambasadës për RTKlive, theksohet se procesi zgjedhor duhet të jetë transparent, i besueshëm dhe i lirë nga ndërhyrjet politike. Ajo shpreh shqetësimin për dukjen e kritereve të motivuara politikisht në procesin e certifikimit të kandidatëve nga KQZ, duke theksuar se këto veprime dëmtojnë parimet themelore demokratike të zgjedhjeve të lira dhe të ndershme, duke hapur mundësinë për ndikim politik subjektiv në procesin zgjedhor.
Ambasada e SHBA-së ka theksuar se KQZ ka një rol të rëndësishëm në mbikëqyrjen e zhvillimit të zgjedhjeve dhe sigurinë e zbatimit të ligjit në mënyrë të drejtë dhe të paanshme. Ajo apelon që përgjegjësitë e KQZ-së të mbeten të ngulitura në procedurat ligjore dhe jo në konsiderata politike.
Kjo ambasadë gjithashtu i ka bërë thirrje çdo partie që ka probleme me proceset e KQZ-së që të përdorë mekanizmat institucionalë të vendosur, siç është Paneli i Ankesave dhe Kërkesave Zgjedhore (PAKZ).
/rtsh.al/
