Psikologia Jonada Kërkuti ka deklaruar në emisionin “Jetë Shqiptare” në RTSH1 se nuk mund të jetë tradhtia që mund ta ketë bërë Alma Arrazin të ndërmarrë aktin ekstrem të vetëmbytjes në lumin Buna së bashku me tre fëmijët e saj.
Sipas Kërkutit, duhet të ketë elementë të tjerë që nuk dihen akoma të cilat sipas psikologes mund të shërbejnë për zbardhjen e shkaqeve të ngjarjes.
Ajo thekson se në aspektin psikologjik askush nuk mund të ndërmarrë një akt ekstrem si ai i Alma Arrazit disa ditë më parë në Shkodër.
“Është e çuditshme se si kunata e ka bërë këtë deklaratë në lidhje me shtytjen e fundit që i dha Almës të ndërmarrë këtë hap. Por në aspekt profesional nuk e shikoj kështu. Nuk mendoj se mund të ketë qenë ai moment që thuhet në deklaratë, të ketë parë partnerin e saj me dikë tjetër dhe t’i ketë dhënë këtë goditje kaq të madhe traumatike sa ajo të ndërmerrte këtë hap. Mund të jetë faktorë të tjerë të paditur që mund të na çojnë në zbardhjen e të gjithë ngjarjes. Por në aspekt psikologjik askush nuk e ndërmerr një hap kaq ekstrem vetëm nga një tradhti, edhe sikur të jetë e përpunuar për shumë kohë. Duhen faktorë të tjerë të ndërlidhur, mund të jetë nga trashëgimia, mund të ketë persona të tjerë të afërm që kanë gjendje emocionale të trazuar në historinë e tyre dhe mund të jetë mjedisi që e suporton vazhdimisht ngritjen e një shqetësimi deri në ndërmarrjen e një hapi të tillë” , u shpreh psikologia Kërkuti.
/rtsh.al/
