Si në mbarë institucionet e arsimit të lartë në vend edhe universiteti “Eqrem Çabej” e zhvillon procesin mësimor online.Ndërsa ka kaluar mbi një muaj nga nisja e vitit të ri akademik , ky proçes ka marrë rrugën e duhur,pavarësisht vështirësive të hasura në fillim.Klaviora Dudumi, përgjegjëse e sektorit të standarteve dhe kurrikulave thotë se është duke u përdorur platforma “Office 365” për realizimin e proçesit mësimor .
“Për implementimin e platformës së re ,fillimisht gjithë stafi akademik u përfshi në një trajnim 3 ditor.Për studentët, në faqen e Web-it të universitetit dhe rrjetet sociale, janë publikuar guida mbi mënyrën e përdorimit të saj.Ne jemi në kontakt me çdo student, që has problem.Nga vëzhgimet kemi konstatuar se të gjithë janë aktivë dhe marrin pjesë rregullisht në proçesin mësimor.Dua të theksoj se edhe me këtë mënyrë ndiqet orari i orëve mësimore , sikur studentët të ishin në auditorë”, -thotë Dudumi.
Burime nga rektorati i univesitetit “Eqrem Çabej” bëjnë të ditur se në ciklin e dytë të studimeve, për këtë vit akademik,janë regjistruar 340 studentë,të cilët janë bërë pjesë e mësimit online prej dy javësh.Risi është çelja e masterit në shkencat infermierore ,ku dhe aplikimet ishin të larta.Për vitin akademik 2020-2021 universiteti i Gjirokastrës frekuentohet ,në të gjitha ciklet e studimit ,nga 1650 studentë.
