Presidenti ukrainas Volodymyr Zelensky ka thënë se do të shtyjë vizitën e tij zyrtare në Arabinë Saudite deri më 10 mars, pasi Kievi u përjashtua nga bisedimet SHBA-Rusi në Riad të martën.
Zelensky kishte thënë të hënën se ai ishte planifikuar të vizitonte Arabinë Saudite më vonë këtë javë.
“Ne nuk ishim të ftuar në këtë takim ruso-amerikan në Arabinë Saudite. Ishte një surprizë për ne. Mendoj se ishte një surprizë për shumë njerëz”, tha Zelensky në një konferencë shtypi në kryeqytetin e Turqisë, Ankara, pas përfundimit të bisedimeve SHBA-Rusi në Riad. “Ne jemi absolutisht të sinqertë dhe të hapur. Nuk dua asnjë rastësi. Kjo është arsyeja pse unë nuk do të shkoj në Arabinë Saudite”, tha ai.
Zelensky tha se ai dëshiron që lufta të përfundojë, “por ne duam që ajo të jetë e drejtë dhe që askush të mos vendosë asgjë pas shpine”.
“Ju nuk mund të merrni vendime pa Ukrainën se si t'i jepni fund luftës në Ukrainë, nuk pranojmë asnjë kusht,” theksoi ai.
Udhëheqësi ukrainas shtoi se ai "pret" një delegacion amerikan të mbërrijë në Kiev. Zelensky tha më herët se Keith Kellogg – i dërguari Rusi-Ukrainë i administratës Trump, i cili nuk ishte pjesë e delegacionit amerikan në Riad – është planifikuar të vizitojë Ukrainën të enjten.
/rtsh.al/
