Kryeministri Edi Rama do të zhvillojë këtë të martë (20 shkurt) një vizitë zyrtare në Turqi, ku do të pritet nga presidenti Rexhep Tajip Erdoan (Recep Tayyip Erdoğan).
Ndalesa e parë e Kryeministrit Rama do të jetë në Anitkabir, Mauzoleumin e Mustafa Kemal Atatürkut, lideri i Luftës Turke për Pavarësi dhe themeluesi e Presidenti i parë i Republikës së Turqisë. Më pas, kryeministri Rama dhe presidenti turk Recep Tayyip Erdogan do të drejtojnë Mbledhjen e Bashkëpunimit të Nivelit të lartë midis dy vendeve, me pjesëmarrjen edhe të disa prej ministrave të kabineteve qeveritare respektive.
Në fokus të takimit do të jenë edhe nënshkrimi i disa marrëveshjeve bashkëpunimi që nga turizmi, menaxhimi i zonave të mbrojtura, marrëveshjet ushtarake dhe bashkëpunimi mes dy radiotelevizioneve, asaj shqiptare dhe turke.
Në agjendën e zbardhur kryeministri Rama do të zhvillojë një takim me presidenti Erdoan dhe më pas do të bëhet edhe nënshkrimi i marrëveshjeve të bashkëpunimit nga ministritë përkatëse, që kontribuojnë në forcimin e raporteve të Shqipërisë me Turqinë. Në fund Rama dhe Erdoan do të kenë edhe një konferencë të përbashkët për shtyp.
Shqipëria është në mesin e vendeve që gëzojnë lidhje të mira me Turqinë, ndërsa në aspektin ekonomik, rreth 300 kompani turke kanë kryer investime që arrijnë deri në 3 miliardë dollarë sipas Ministrisë së Jashtme turke.
Agjenda e vizitës zyrtare:
Ceremonia zyrtare e pritjes së Kryeministrit dhe delegacionit shqiptar nga Rexhep Tajip Erdoan, Presidenti i Republikës së Turqisë
Takim bilateral me Rexhep Tajip Erdoan, President i Republikës së Turqisë
- Paralelisht zhvillohen takime bilaterale të Ministrave sipas portofoleve.
Mbledhja e Këshillit të Bashkëpunimit të Nivelit të Lartë
- Fjalë e z. Rexhep Tajip Erdoan, President i Republikës së Turqisë
- Fjalë e z. Edi Rama, Kryeministër i Republikës së Shqipërisë
- Fjalë e ministrave të dy delegacioneve
- Përfundimet e mbledhjes nga Kryeministri Rama
- Përfundimet e mbledhjes nga Presidenti Erdogan
Ceremonia e nënshkrimit të marrëveshjeve
- Projektmemorandum Mirëkuptimi ndërmjet Ministrisë së Turizmit dhe Mjedisit të Republikës së Shqipërisë dhe Ministrisë së Mjedisit, Urbanizimit dhe Ndryshimeve Klimatike të Republikës së Turqisë për bashkëpunim në fushën e mjedisit.
- Projektmemorandum Mirëkuptimi ndërmjet Ministrisë së Turizmit dhe Mjedisit të Republikës së Shqipërisë dhe Ministrisë së Bujqësisë dhe Pyjeve të Republikës së Turqisë për menaxhimin e qëndrueshëm të pyjeve dhe zonave të mbrojtura.
- Nënshkruesi: znj. Mirela Kumbaro, Ministre e Turizmit dhe Mjedisit
- Projektmarrëveshje ndërmjet KM të RSH dhe Qeverisë së Republikës së Turqisë mbi statusin e zyrës së koordinimit të programit TIKA Tirana
- Nënshkruesi. z. Igli Hasani, Ministër për Europën dhe Punët e Jashtme
- Projektmarrëveshje kuadër ushtarake ndërmjet Këshillit të Ministrave të Republikës së Shqipërisë dhe Qeverisë së Republikës së Turqisë.
- Nënshkruesi: z. Niko Peleshi, Ministër i Mbrojtjes
- Projektmemorandum Mirëkuptimi ndërmjet Qeverisë së RSH dhe Qeverisë së Republikës së Turqisë në Fushat e Medies dhe Komunikimit.
- Nënshkruesi: z. Alteo Hysi, Drejtor i Agjencisë për Media dhe Informim
- Protokoll Bashkëpunimi midis Korporatës Turke të Radiotelevizionit dhe Radiotelevizionit Shqiptar.
- Nënshkruesi: z. Alfred Peza, Drejtor i Radiotelevizionit Shqiptar
Deklarate e përbashkët shtypi e Kryeministrit Rama dhe Presidentit Erdoan
/rtsh.al/
