Turizmi shqiptar vazhdon të shënojë një nivel rekord të ardhurash. Kjo jo vetëm për shtetasit e huaj që kanë udhëtuar në Shqipëri, por edhe për shtetasit shqiptarë që kanë udhëtuar jashtë vendit.
Të dhënat e Bankës së Shqipërisë në bilancin e pagesave bëjnë të ditur se në 6 mujorin e parë të vitit 2023, shpenzimet e të huajve që kanë udhëtuar në Shqipëri arritën në total 1.55 miliardë euro.
Kjo është shifra më e lartë e regjistruar ndonjëherë pas viteve ’90.
Ekspertët thonë se ato reflektojnë kthimin e Shqipërisë në një destinacion të preferuar turistik këtë vit.
Shpenzimet e të huajve për udhëtime janë rritur me 37% në krahasim me të njëjtën periudhë të një viti më parë.
Vetëm në tremujorin e dytë, shpenzimet e të huajve arritën në 930 milionë euro, me rritje prej gati 30% në krahasim me të njëjtën periudhë të një viti më parë.
Të dhënat e tjera të INSTAT bënë të ditur se në periudhën janar-qershor, numri i shtetasve të huaj që kanë hyrë në territorin shqiptar është
3.396.932. Ky numër është rritur me 33,0 %, krahasuar me të njëjtën periudhë të vitit 2022.
Por veç të huajve që po vizitojnë Shqipërinë, gjithnjë e më shumë shqiptarë po zgjedhin të udhëtojnë jashtë vendit.
Sipas të dhënave të Bankës së Shqipërisë, për gjashtë muajt e parë të vitit shpenzimet e shqiptarëve për udhëtimet jashtë ishin 977 miilionë euro, me një rritje prej 23% në krahasim me janar-qershor 2022.
Të dhënat e tjera të INSTAT bënë të ditur se numri i shtetasve shqiptarë të dalë nga territori i Shqipërisë gjatë gjashtëmujorit të parë 2023, është 3.024.102, duke u rritur me 20,0 %, krahasuar me të njëjtën periudhë të një viti më parë.
Ndonëse të huajt kanë shtuar shpenzimet në Shqipëri, e njëjta gjë ka ndodhur dhe me shtetasit shqiptarë që udhëtojnë jashtë.
Megjithatë bilanci është pozitiv në favor të hyrjeve. Sipas Bankës së Shqipërisë, bilanci i udhëtimeve, që mat diferencën mes shpenzimeve të të huajve në Shqipëri dhe shqiptarëve jashtë ishte 794 milionë euro, që është shifra më e lartë e regjistruar ndonjëherë.
Që prej vitit 2015, Shqipëria ka një bilanc pozitiv të udhëtimeve, i cili vjen duke u rritur viti pas viti.
/ rtsh.al /