Presidenti Donald Trump bëri të ditur se ai dhe presidenti rus, Vladimir Putin kanë rënë dakord të fillojnë "negociatat" për t'i dhënë fund luftës në Ukrainë.
Republikani e tha këtë në një postim në mediat sociale të mërkurën, duke zbuluar një telefonatë midis dy liderëve se ata do të "punonin së bashku, shumë ngushtë".
Zyrtarët e administratës Trump thanë se shpresonin se biseda mund të paraqesë përpjekje të reja për t'i dhënë fund konfliktit në Ukrainë, i cili po hyn në vitin e tij të katërt.
Në një publikim të bisedës të postuar në Truth Social, Trump tha: “Ne diskutuam për Ukrainën, Lindjen e Mesme, Energjinë, Inteligjencën Artificiale, fuqinë e dollarit dhe tema të tjera të ndryshme”.
Trump kishte sinjalizuar për javë të tëra dëshirën e tij për të folur me Putinin, ndërsa ai po punon për të zgjidhur konfliktin në Ukrainë.
“Ne ramë dakord të punonim së bashku, shumë ngushtë, duke përfshirë edhe vizitat te njëri-tjetri. Ne kemi rënë gjithashtu dakord që ekipet tona përkatëse të fillojnë menjëherë negociatat dhe do të fillojmë duke telefonuar Presidentin Zelenskyy, të Ukrainës, për ta informuar atë për bisedën, diçka që unë do ta bëj tani”, shkroi Trump.
Paraardhësi i tij, Presidenti Joe Biden, nuk kishte folur me homologun e tij rus për gati tre vjet.
Telefonata pasoi një shkëmbim të burgosurish që rezultoi në lirimin e mësuesit amerikan të shkollës nga Pensilvania, Marc Fogel nga Rusia, pas më shumë se tre vitesh paraburgim.
Alexander Vinnik, një kriminel i dënuar rus, po lirohet si pjesë e një shkëmbimi që solli lirimin e Fogel nga Moska, konfirmuan të mërkurën dy zyrtarë amerikanë. Zyrtarët folën në kushte anonimiteti për të diskutuar shkëmbimin.
/rtsh.al/
