Tre të akuzuarit për sulmin terrorist në Banjskë kundërshtuan përsëri të mërkurën akuzën dhe provat e Prokurorisë së Kosovës për përfshirjen e tyre në ngjarjen e 24 shtatorit 2023.
Seanca e dytë ndaj tyre u mbajt në Gjykatën Themelore në Prishtinë, e cila do të shqyrtojë edhe rëndesën penale të 45 akuzuarve në total.
"Sa i përket 42 personave që janë të akuzuar, për ta nuk ka më jetë. Ata janë në kërkesën e kuqe të Interpolit, nuk mundet të dalin prej Serbisë, ose kur t’i vijë koha do dorëzohen në Kosovë," tha avokati Arianit Koci, mbrojtës i familjes së ish-policit Afrim Bunjaku, i cili mbeti i vrarë nga sulmi.
Dushan Maksimoviq, Vladimir Toliq dhe Blagoje Spasojeviq u deklaruan jofajtorë, ndërsa Toliqi nuk u deklarua. Dy javë më parë u shty seanca me kërkesën e avokatëve.
"Natyrisht, nuk e kontestojmë se ai ka qenë pjesëtar i grupit të armatosur që ka ndodhur në Banjskë atë ditë, mirëpo, tani për tani nuk mund ta pranojmë këtë përmbajtje të aktakuzës. Do të shfrytëzojmë të drejtën e kundërshtimit në aktakuzë," deklaroi pas seancës avokati i Toliqit, Milos Deleviq.
Përballë të akuzuarve u rreshtuan edhe policë dëshmitarë të sulmit të vitit të kaluar.
Më 11 shtator, Prokuroria Speciale ngriti akuzë ndaj ish-nënkryetarit të Listës Serbe, Milan Radoiçiq, dhe 44 të tjerëve për sulmin e 24 shtatorit në Banjskë të Zveçanit.
Prokuroria pretendon se përmes dhunës dhe të armatosur rëndë, të akuzuarit "kryen vepra terroriste të rënda kundër rendit kushtetues dhe sigurisë së Republikës së Kosovës" dhe tentuan të shkëpusin pjesën veriore të vendit për ta bashkuar me Serbinë. /IO, Ekonomia
/rtsh.al/
