Një skandal diplomatik ka ndodhur në aeroportin e Shkupit ku presidentes së Kosovës, Vjosa Osmani kanë tentuar t’i marrin telefonin celular ndërsa autoritetet e kanë mbajtur të bllokuar në avion për rreth 1 orë.
Ashtu siç bën të ditur edhe Presidenca e Kosovës, situata u rëndua edhe më tej kur sigurimi i aeroportit tentoi t'ia merrte me forcë çantën dhe telefonin personal, Vjosa Osmanit.
Sipas Presidencës së Kosovës, sigurimi i Aeroportit ka tentuar ta shtyjë fizikisht Osmanin duke bërë që policia e Kosovës të ndërhynte dhe të siguronte kalimin e saj.
"Ai ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën. Kjo sjellje e zyrtarit maqedonas të aeroportit është në kundërshtim me çdo praktikë ndërkombëtare, sipas të cilave kur krerët e shtetit udhëtojnë, ata mbrohen me privilegje e imunitete diplomatike. Në kundërshtim me këto rregulla, pala maqedonase ka marrë çantën personale të dorës së presidentes," thuhet më tej në njoftimin e Presidencës. Edhe pse kundër rregullave, bëhet e ditur se, ekipi i Presidentes lëshoi pe që Osmani të futej në aeroport, konkretisht në sallën VIP, e cila ishte rezervuar me notë verbale të Ambasadës së Kosovës, siç është praktika për udhëtimet e krerëve të shtetit", thuhet në njoftimin e Presidencës së Kosovës.
Sipas Presidencës, Vjosa Osmani për arsye të sigurisë, "në asnjë mënyrë nuk është lejuar që të dorëzohet telefoni personal. Sjellja arrogante dhe e dhunshme e zyrtarit të Aeroportit të Shkupit është e paprecedente dhe nuk ka ndodhur asnjëherë në asnjë udhëtim të presidentes kudo në botë, përfshirë në shtete jonjohëse. Vërehet qartë se në rastin në fjalë kishte tendencë për ta provokuar delegacionin e Republikës së Kosovës dhe për të shkaktuar incident"
Presidentja ka njoftuar për këtë skandal diplomatik të shkaktuar nga pala maqedonase kryetarin e Kuvendit z.Afrim Gashi, të cilin e falënderon për ndihmën e ofruar, ndërsa është mbajtur për rreth 1 orë në avion.
"Vlen të përmendet se pas hyrjes së Presidentes në aeroplan, Aeroporti i Shkupit nuk e ka lejuar aeroplanin komercial të niset edhe për më shume se një orë, me pretekstin se shteti slloven nuk po e lejon nisjen, për shkak se nuk do të ishte gati për aterrim.
Kabineti i Presidentes e ka kontaktuar palën sllovene të cilët na kanë informuar që një gjë e tillë absolutisht nuk është e vërtetë dhe se aeroplani do të mund të ateronte në kohën e planifikuar. Presidenca e konsideron çdo sulm dhe trajtim të parregullt e në kundershtim me konventat ndërkombëtare të zyrtarëve të lartë shtetëror si sulm ndaj vete shtetit të Kosovës. Republika e Kosovës, asnjëherë në historinë e saj, nuk ka trajtuar në mënyrë të tillë Presidentin/Presidenten, Kryeministrin apo Ministrat e Maqedonisë së Veriut e as të ndonjë vendi tjetër e as nuk do të lejojë një ndonjëherë një gjë të tillë", thuhet më tej në reagimin e Presidencës së Kosovës.
/rtsh.al/
