Historitë frymëzuese të shqiptarëve në diasporë janë shtuar gjithnjë e më shumë vitet e fundit për shkak të integrimit të tyre në vendet ku jetojnë.
Greta Rraboshta prej 14 vitesh e ka lënë Shkodrën për qytetin e Gentit në Belgjikë, por jo profesionin e mësueses.
"Ngaqë e doja shumë, më ka rrjedhur shumë natyrshëm. E kam pasur ëndërr të jem pedagoge. Kam mësuar shumë. Këtë ëndërr e kam realizuar," thotë znj. Rraboshta.
Integrimi në jetën e një vendi të zhvilluar si Belgjika nuk ka qenë i lehtë, por Greta ia ka dalë mjaft mirë. Ajo jep kontributin e saj edhe në mësimin e lëndëve bazike për komunitetin shqiptar.
"E kisha të nevojshme që ta mësoja shumë mirë gjuhën, që të isha e pavarur ekonomikisht siç kisha qenë në Shqipëri. Nuk ka qenë e thjeshtë. Edhe të gjeja një punë nuk ka qenë e thjeshtë. Në Belgjikë janë shumë të sjellshëm, por janë racionalë, të ftohtë dhe pavarësisht që mund ta kisha CV-në e mirë ata zgjedhin belgun e tyre," tregon mësuesja.
E lindur në Shkodër, Greta Rraboshta për vite me radhë ka kontribuar si pedagoge në Universitetin “Luigj Gurakuqi” për lëndën e Biologjisë.
Gazetar: Marjo Gjini
/rtsh.al/
