Numrit të madh të bashkëpunimeve të Radiotelevizionit Shqiptar me transmetuesit publikë ndërkombëtarë i shtohet dhe një tjetër partneritet i suksesshëm.
Në Ankara të Turqisë, finalizohet sot Protokolli i Bashkëpunimit mes RTSH-së dhe Korporatës së Radiotelevizionit Turk (TRT). Drejtori i Përgjithshëm i RadioTelevizionit Shqiptar, Alfred Peza dhe homologu turk Mehmet Zahid Sobaci do të firmosin Protokollin e Bashkëpunimit në prani të kryeministrit Edi Rama dhe presidentit turk, Rexhep Tajip Erdoan.
Po çfarë pritet nga ky bashkëpunim mes RTSH-së dhe TRT-së?
Me 14 pika, ky protokoll synon përmirësimin më tej të bashkëpunimit mes dy televizioneve. Konkretisht, pjesëmarrësit do të fitojnë të drejtat e transmetimit të programeve radiotelevizive falas ose kundrejt një tarife për një periudhë të caktuar licence ose do të shkëmbejnë programe pa pagesë.
Dy televizionet do të përdorin programet e radios dhe televizionit të siguruara për një periudhë të caktuar të licensuar vetëm për transmetimet e tyre si dhe do të marrin pjesë, reciprokisht dhe sipas mundësive dhe aftësive të tyre, në festivale radio dhe TV, konkurse dhe shfaqje kulturore në vendet e njëri-tjetrit.
Tashmë, me 16 kanale televizive, Radio Televizionit Shqiptar është padyshim një bashkëpunëtore dinjitoze dhe me transmetuesit e mëdhenj publik të huaj siç është Korporata e Radiotelevizionit Turk (TRT).
Protokolli i Bashkëpunimit
Ky Protokoll i Bashkëpunimit është nënshkruar për të përmirësuar dhe zhvilluar bashkëpunimin midis Pjesëmarrësve dhe nuk përbën një marrëveshje sipas së drejtës ndërkombëtare. Asnjë dispozitë e këtij Protokolli nuk do të interpretohet dhe zbatohet si krijim i të drejtave dhe angazhimeve ligjore për Shtetet e Pjesëmarrësve.
Seksioni 1
Pjesëmarrësit do të fitojnë të drejtat e transmetimit të programeve radiotelevizive falas ose kundrejt një tarife për një periudhë të caktuar license ose do të shkëmbejnë programe pa pagesë. Qëllimi, kohëzgjatja dhe kushtet e tjera të të drejtave të transmetimit do të përcaktohen me një kontratë të veçantë që do të nënshkruhet nga të dy pjesëmarrësit.
Seksioni 2
Kostot e transportit të programeve që blihen për një periudhë të caktuar të licensuar dhe/ose shkëmbehen pa pagesë do të përballohen nga Pjesëmarrësi kërkues.
Seksioni 3
Pjesëmarrësit do të përdorin programet e radios dhe televizionit të siguruara për një periudhë të caktuar të licensuar vetëm për transmetimet e tyre dhe nuk mund t'i transferojnë të drejtat palëve të treta për transmetim ose për ndonjë qëllim tjetër.
Si rezultat i shkeljes së dispozitës së këtij ligji, dëmet e shkaktuara nga pjesëmarrësi furnizues ose palët e treta do t'i paguhen plotësisht në kesh/në dorë palës tjetër brenda 30 ditëve pas njoftimit me shkrim.
Seksioni 4
Pjesëmarrësit janë të lirë të transmetojnë programet radio-televizive pjesërisht ose të plota, pa ndryshuar strukturën e tyre; ose të mos i transmetojnë ato.
Seksioni 5
Çdo mosmarrëveshje që lind nga përdorimi i programeve, në lidhje me transmetimin dhe të drejtat e autorit, do të zgjidhet nga Pjesëmarrësi që ofron programet përkatëse, nën dispozitat e këtij protokolli.
Seksioni 6
Pjesëmarrësit do të diskutojnë në mënyrë të veçantë ofertat e tyre të bashkëprodhimeve duke përmendur temat e prodhimit, buxhetet, skenarin, kontributet teknike dhe administrative për secilin prodhim dhe pas pajtimit, ata do të nënshkruajnë një kontratë të veçantë për kushtet e prodhimit.
Seksioni 7
Pjesëmarrësit do të marrin pjesë, reciprokisht dhe sipas mundësive dhe aftësive të tyre, në festivale radio dhe TV, konkurse dhe shfaqje kulturore në vendet e njëri-tjetrit.
Gazetare: J.Sagajeva
/rtsh/
