Policia Kufitare dhe Njësia Policore Detare bëri të ditur se gjatë javës që u mbyll operacionin “Siguria detare”, duke parë edhe fluksin e lartë të frekuentimit të plazheve të vendit nga pushuesit, nga Ksamili në Koman, kanë bllokuar 17 mjete lundruese. Mjetet e bllokuara, sipas policisë, janë 9 jet ski, 4 skafe, 3 gomone dhe 1 varkë metalike.
“10 mjete lundruese janë bllokuar nga Ksamili në Vlorë. 5 mjete lundruese janë bllokuar nga Durrësi në Shëngjin. 1 mjet lundrues është bllokuar në Velipojë dhe 1 varkë metalike me motor uji për lundrim është bllokuar në Koman.”, njofton policia.
Pesë prej mjeteve lundruese të bllokuara janë konstatuar nga shërbimet e Policisë Kufitare dhe ato të Njësisë Policore Detare, duke lundruar brenda perimetrit të sigurisë, shkelje e cila rrezikonte jetën e pushuesve. Drejtuesit e këtyre mjeteve janë ndëshkuar secili me masë administrative prej 100,000 lekësh të rinj.
“Drejtuesit e 12 mjeteve të tjera lundruese, krahas masës së bllokimit të mjeteve, u ndëshkuan secili me masë administrative prej 10,000 lekësh për mungesë dokumentacioni. Po gjatë kësaj jave, Njësia Policore Detare dhe Policia Kufitare iu kanë dhënë ndihmë turistëve dhe vizitorëve në 11 raste në hapësirën detare nga Ksamili në Koman. Në shumicën e rasteve, turistëve ju rrezikohej seriozisht jeta për shkak të prishjes së mjeteve lundruese apo pamundësisë për t’u kthyer në breg për shkak të dallgëve.”, mbyllet njoftimi i policisë.
/rtsh.al/
