Parlamenti i Bullgarisë vendosi të mos lejojë që forcat e armatosura të marrin pjesë në operacionet ushtarake në territorin e Ukrainës .
Në veçanti, deputetët bullgarë miratuan sot (e premte) një deklaratë në të cilën shprehin qëndrimin e Asamblesë së 51-të Kombëtare për mospjesëmarrjen e forcave të armatosura bullgare në operacionet ushtarake në territorin e Ukrainës.
Gjithsej 166 deputetë votuan pro, 27 kundër dhe 11 abstenuan.
Deklarata bën thirrje për një paqe të qëndrueshme dhe të drejtë në Ukrainë dhe për një proces negocimi që përfshin të gjitha vendet e prekura drejtpërdrejt dhe të interesuara për rivendosjen dhe ruajtjen e sigurisë dhe stabilitetit në Evropë, duke përfshirë Bullgarinë.
Parlamenti gjithashtu i bën thirrje kabinetit qeveritar që të vazhdojë politikën e Republikës së Bullgarisë për zgjidhjen paqësore të konflikteve ndërkombëtare me anë të diplomacisë dhe të promovojë iniciativa që synojnë deskalimin e konflikteve dhe gjetjen e zgjidhjeve të qëndrueshme dhe paqësore.
/rtsh.al/
