Opozita malazeze dorëzoi sot në Parlament mocionin për rrëzimin e qeverisë së Dritan Abazoviç. Kjo nisëm e opozitës është ndërmarrë pas nënshkrimit të marrëveshjes me Kishën Ortodokse serbe nga ana e qeverisë. Kryetari i klubit të përfaqësuesve të Partisë Demokratike të Socialistëve (DPS), Danijel Zhivkoviç, njoftoi dorëzimin e mocionit.
“Veprimet e sotme të Qeverisë dhe Abazoviçit nuk mund të kenë mbështetjen tonë, prandaj ne e kemi shpallur qëndrimin tonë për nënshkrimin e një kontrate të tillë me Kishën Ortodokse Serbe”, ka thënë Zhivkoviç.
Ai shtoi se iniciativa për rrëzimin e Qeverisë është nënshkruar nga SDP, Mehmed Zenka, Partia Liberale dhe Socialdemokratët.
“Kryeministri, duke injoruar pikëpamjet e institucioneve më të rëndësishme shkencore, përfshirë CANU-në si dhe ekspertët dhe organizatat e shoqërisë civile, duke injoruar me vetëdije pasojat e mundshme të veprimeve të tilla në situatën e përgjithshme në Mal të Zi, vendosi çështjen e marrëdhënieve me Kishën ortodokse serbe në plan të parë”, tha Zhivkoviç.
/rtsh.al/