Murtaja afrikane e derrit është rishfaqur sërish në Lezhë, në një fermë derrash në fshatin Ishull Lezhë. Zona është vendosur në karantinë nga Shërbimi Veterinar, ndërsa deri më tani kanë ngordhur rreth 50 derra, ku po punohet për asgjësimin e tyre. Prej konstatimit të rastit në terren janë vendosur grupet e monitorimit, që po analizojnë situatën dhe po kryejnë depistimin e të gjithë zonës.
Vatra e identifikuar ndodhet pranë zonës së banuar dhe janë shumë familje që mbajnë derra, ndaj është kërkuar bashkëpunimi i tyre, por nga ana tjetër konsumatorëve u është kërkuar që të mos blejnë mish të pacertifikuar nga thertoret.
Grupet e punës nga Shërbimi Veterinar në Lezhë vazhdojnë të jenë në zonën e prekur me qëllim që të parandalohet përhapja e mëtejshme e kësaj sëmundjeje. Murtaja afrikane e derrit u shfaq për herë të parë në Lezhë në fund të muajit nëntor, në zonën e Malit të Rrencit në Shëngjin ku u konstatuan 10 derra të ngordhur, kryesisht të egër. Zona u mbajt në karantinë për 21 ditë dhe gjatë kësaj kohe nuk pati raste të tjera.
/rtsh.al/
