15.323 nxënës të sistemit parauniversitar në Shkodër janë rikthyer në bankat e shkollës këtë të hënë.
Drejtorja vendore e Zyrës Arsimore, Brisela Kadija, tregon se institucionet arsimore e kanë vijuar normalisht procesin mësimor edhe në zona të thella malore.
Risi është rikonstruksioni i 2 shkollave, që sapo ka nisur, si dhe një terren sportiv, i cili ka përfunduar në shkollën “Adem Haxhija” në Postribë.
"Kemi dy shkolla që janë në rikonstruksion total dhe nxënësit e tyre janë transferuar në dy institucione të tjera arsimore - shkollat 'Ndre Mjeta' dhe 'Kolë Idromeno' - duke e zhvilluar procesin arsimor me turne të alternuara. Vazhdojnë investimet edhe në terrenet sportive. Kemi bashkëfinancimin e bashkisë Shkodër me ministrinë, që është finalizuar me shkollën 'Adem Haxhija' në Postribë dhe tashmë nxënësit mund të zhvillojnë lëndën e edukimit fizik," thotë drejtoresha e ZVA-së, znj. Kadija.
Nxënësit nisën një vit të ri kalendarik pas pushimeve 2 javore.
Gazetar: Marjo Gjoni
/rtsh.al/
