Po zhvillohet edicioni i tetë i Maratonës së Tiranës. Këtë vit, në Maratonën e Tiranës në garë janë 4000 pjesëmarrës jo vetëm nga Shqipëria, por gjithashtu dhe nga vende të huaja.
Maratona ka nisur në orën 09:00 dhe do të mbyllet në orën 16:00, ndërsa do të zhvillohet në katër kategori kryesore: “Marathon” 42 km, “Half Marathon” 21 km, “Tirana 10K”, 10 km, dhe “We Too” 5 km.
Ndërkohë ka përfunduar me sukses Maratona për distancën 10 km. Në podiumin e meshkujve, David Nikolla nga Shqipëria u shpall fitues, duke lënë pas konkurrentët e tjerë me një performancë të shkëlqyer. Pas tij, në vendin e dytë u rendit Albion Ymeri nga Kosova dhe Bogdan Somenoyyeh nga Ukraina zuri vendin e tretë.
Në kategorinë e femrave, fituesja e garës ishte Gresa Bakraqi nga Kosova, e cila u shfaq në formë të shkëlqyer. Redia Dauti nga Shqipëria u klasifikua në vendin e dytë, ndërsa Luisa Gaia Dal Molin nga Italia përfundoi garën në vendin e tretë.
Për të siguruara mbarëvajtjen e Maratonës është ndaluar edhe qarkullimi i automjeteve nga sheshi “Nënë Tereza” deri në fundin e bulevardit “Dëshmorët e Kombit”. Ndërkohë është hartuar edhe një plan që parashikon devijimin e lëvizjes së automjeteve dhe linjave të transportit urban që operojnë brenda kryeqytetit deri në orën 16:00.
Programi i nisjes:
08:50 Garuesit afrohen në zonën e Startit
08:55 Thirrja e fundit
09:00 Start 42 km
09:05 Start 21 km
09:10 Start 10 km
09:30 Start We Too
/rtsh.al/
