Ishte radha e Komisionit të Ligjeve për të diskutuar propozimin e deputetit të PS-së, Blendi Klosi, për shtyrjen deri në dhjetor 2026 të afatit të përjashtimit nga tatimi për hotelet luksoze me 4 dhe 5 yje.
Ndryshimet ligjore të propozuara u shoqëruan me debate mes pozitës dhe opozitës, por mosdakordësi pati edhe mes deputetëve të Partisë Socialiste.
Për deputetin Majko, shtyrja e afatit është e pakuptimtë.
"Pse e sillni përsëri për një shtyrje dy- apo pesëvjeçare, siç thatë? Industria jonë e turizmit bazohet në hotele me 3 yje e poshtë, ku unë jam frekuentues i rregullt. Shpresoj që ju të kuptoni që unë do të abstenoj për propozimin tuaj," u shpreh z. Majko.
"Dua t'ju kujtoj që vetëm 12 muajt e fundit nga deputetë të veçantë të Partisë Socialiste janë depozituar projektligje me efekte shumë të rëndësishme në buxhetin e shtetit, por edhe në konkurrueshmëri," deklaroi deputetja demokrate, Dhurata Çupi.
Ndërkohe për ish-ministrin Blendi Klosi, ndryshimet e propozuara do të sjellin efekte edhe në afrimin e shqiptarëve, të cilët punojnë jashtë vendit.
"22 struktura do të operojnë në nivelin më të lartë të turizmit dhe shumë të tjera do e ndjekin këtë linjë duke rritur pagat në sektor, duke pasur menaxhim me standarde të njëjta si në gjithë Europën. Ky sektor po bëhet një magnet për të kthyer me dhjetëra e qindra shqiptarë që kanë eksperienca të ngjashme," tha z. Klosi.
Në përfundim, edhe pse me dy vota kundër dhe dy abstenime, projektligji mori miratimin e Komisionit të Ligjeve.
Gazetar: Omer Saraçi
/rtsh.al/
