Të ardhurat mesatare do të bien me pothuajse një të pestën brenda 26 viteve të ardhshme si rezultat i krizës klimatike. Kështu zbuloi një studim i ri që tregon se kostot e dëmit janë gjashtë herë më të larta se çmimi i kufizimit të ngrohjes globale në 2 gradë Celsius.
Rritja e temperaturave, reshjet më të dendura dhe moti ekstrem më i shpeshtë dhe intensiv parashikohet të shkaktojnë 38 trilion dollarë shkatërrim çdo vit nga mesi i shekullit, tregon hulumtimi i botuar në revistën Nature, e cila është analiza më gjithëpërfshirëse e llojit të saj ndonjëherë.
Sipas studimit, humbja mesatare e përhershme e të ardhurave në mbarë botën do të jetë 19% deri në vitin 2049. Në Shtetet e Bashkuara dhe Europë ulja është rreth 11%, ndërsa në Afrikë dhe Azinë Jugore është 22%.
"Është shkatërruese," tha Leonie Wenz, një shkencëtare në Institutin e Potsdamit për Kërkimin e Ndikimit Klimatik dhe një nga autorët e studimit. “Jam mësuar që puna ime të mos ketë rezultate të mira shoqërore, por u befasova se sa të mëdha ishin dëmet. Dimensioni i pabarazisë ishte vërtet tronditës.”
Studimi shqyrtoi gjithashtu gjysmën e dytë të këtij shekulli, ku veprimet njerëzore tani mund të bëjnë ende një ndryshim të madh. Autorët parashikuan humbje mesatare të të ardhurave prej më shumë se 60% deri në vitin 2100. Por nëse emetimet bien në zero deri në mesin e shekullit, atëherë rënia e të ardhurave do të stabilizohet në mesin e shekullit në rreth 20%.
Goditja ekonomike e parashikuar është më shumë se dy herë më e lartë se çdo analizë e mëparshme. Pas këtij ndryshimi qëndron një metodologji më e sofistikuar. Ndërsa shumica e studimeve të mëparshme morën parasysh vetëm dëmet që lidhen me rritjen e temperaturave në nivel kombëtar, dokumenti përfshiu gjithashtu reshjet dhe ndikimet ekstreme të motit duke përdorur të dhëna 40 vjeçare nga 1600 rajone. Studimi shqyrtoi gjithashtu se si ndikimet tentojnë të vazhdojnë gjatë muajve dhe viteve.
Sipas studimit, më të prekura do të jenë vendet në rajonet tashmë të nxehta duke përfshirë Botsvanën, Malin, Irakun, Katarin, Pakistanin dhe Brazilin.
“Reduktime të forta të të ardhurave parashikohen për shumicën e rajoneve, duke përfshirë Amerikën e Veriut dhe Evropën, me Azinë Jugore dhe Afrikën që janë prekur më së shumti. Këto janë shkaktuar nga ndikimi i ndryshimeve klimatike në aspekte të ndryshme që janë të rëndësishme për rritjen ekonomike, si rendimentet bujqësore, produktiviteti i punës ose infrastruktura”, tha Maximilian Kotz, një autor i studimit.
Edhe pse skenari është shumë më i keq se çdo parashikim më parë, autorët e pranojnë se ai është ende konservator dhe i paplotë. Ka shumë ndikime të mëdha klimatike që nuk janë përfshirë ende në analizën e tyre, duke përfshirë valët e të nxehtit, ngritjen e nivelit të detit, ciklonet tropikale, pikat e kthesës dhe dëmtimin e ekosistemeve natyrore dhe shëndetin e njeriut. Autorët thanë se këta faktorë do të shtohen në modelet e ardhshme.
“Ne po ofrojmë një pamje më gjithëpërfshirëse, por kjo nuk është fotografia përfundimtare,” tha Wenz.
Autorët thanë se studimi tregoi nevojën për strategji më të forta përshtatjeje, veçanërisht në vendet më të varfra dhe të prekura më keq, për të përballuar ndryshimet deri në vitin 2050./ The Guardian
/rtsh.al/
