Një sasi rekord prej 13 tonësh lëndë narkotike të llojit kokainë ka sekuestruar policia spanjolle gjatë një bastisjeje në një anije me kontejnerë me banane në portin jugor të Algeciras.
Anija kishte mbërritur nga qyteti i Guayaquil-it në Ekuador, i njohur si qendër e trafikimit të lëndëve narkotike. Pas marrjes së informacioneve nga policia e Ekuadorit, policia dhe agjentët doganorë të Spanjës, gjetën sasinë e kokainës të fshehur në arkat me banane.
Për drogën u arrestua një grua që besohet se është partner në kompaninë që importonte bananet ndërsa dy të dyshuar të tjerë janë në arrati. Spanja është pikë kryesore hyrëse e drogës në Europë për shkak të lidhjeve të ngushta me ish kolonitë e saj në Amerikën Latine si dhe afërsinë gjeografike me Marokun, prodhues kryesor i kanabisit.
/RTSH/
