Udhëheqja dhe aleatët e Iranit po përgatiten për atë që do ta konsideronin si një rezultat të tmerrshëm të zgjedhjeve të afërta presidenciale në SHBA: Një kthim në pushtet i Donald Trump, shkruan Reuters.
Sondazhet sugjerojnë se republikani Trump dhe zëvendëspresidentja demokrate Kamala Harris mbeten të bllokuar në një garë të ngushtë.
Por, udhëheqësit iranianë dhe aleatët e tyre rajonalë në Liban, Irak dhe Jemen janë të shqetësuar se Trump mund të triumfojë më 5 nëntor dhe kjo mund të sjellë më shumë telashe për ta.
Sipas zyrtarëve iranianë, arabë dhe perëndimorë, “Shqetësimi kryesor i Iranit është se Trump mund të fuqizojë kryeministrin izraelit Benjamin Netanyahu për të goditur objektet bërthamore të Iranit, për të kryer atentate në shënjestër dhe për të rivendosur “politikën e tij të presionit maksimal” përmes sanksioneve të rritura në industrinë e tyre të naftës”.
Ata parashikojnë që Trumpi, i cili ishte president në 2017-2021, do të ushtrojë presionin maksimal ndaj liderit suprem iranian Ayatollah Ali Khamenei, për t’u dorëzuar duke pranuar një marrëveshje kontrolli bërthamor sipas kushteve të vendosura nga ai dhe Izraeli.
Ky ndryshim i mundshëm në udhëheqjen e SHBA-së mund të ketë implikime të gjera për balancën e fuqisë në Lindjen e Mesme dhe mund të riformojë politikën e jashtme dhe perspektivat ekonomike të Iranit.
Analistët argumentojnë se pavarësisht nëse administrata e ardhshme e SHBA-së do të udhëhiqet nga Harris apo Trumpi, Iranit do t’i mungojë fuqia që kishte dikur, kryesisht për shkak të fushatës ushtarake 1-vjeçare të Izraelit, që synon eleminimin e përfaqësuesve të armatosur të Republikës Islamike, duke përfshirë Hamasin në Gazë dhe Hezbollahun në Liban.
Megjithatë, qëndrimi i Trumpit perceptohet si më i dëmshëm për Iranin, për shkak të mbështetjes së tij për Izraelin.
“Trumpi ose do të vendosë kushte shumë të ashpra ndaj Iranit ose do ta lejojë Izraelin të kryejë sulme të shënjestruara në objektet e tij bërthamore. Ai po mbështet plotësisht një veprim ushtarak kundër Iranit,” tha Abdelaziz al-Sagher, kreu i qendrës kërkimore të Gjirit.
“Është dita e ëndrrave të Netanyahut që të ketë Trumpin sërish në Shtëpinë e Bardhë”, tha ai.
Në një fjalim elektoral në tetor, Trumpi deklaroi mungesën e gatishmërisë së tij për të shkuar në luftë me Iranin, ndërsa shtoi se Izraeli duhej “të godiste së pari bërthamën iraniane dhe të shqetësohej për pjesën tjetër më vonë”, në përgjigje të sulmit raketor të Iranit ndaj Izraelit më 1 tetor.
Izraeli u kundërpërgjigj me sulme ajrore ndaj objektivave ushtarake iraniane, veçanërisht vendeve të prodhimit të raketave, më 26 tetor.
“Zgjedhjet e Iranit janë të kufizuara në të ardhmen”, thanë analistët.
Nëse Trump do të rivendoste sanksione të rrepta, lideri suprem iranian Ayatollah Ali Khamenei mund të detyrohej të negocionte dhe të pranonte një pakt bërthamor më të favorshëm për termat e SHBA-së dhe Izraelit – për të ruajtur sundimin teokratik në Iran, i cili po përballet me presionin e huaj në rritje dhe i cili është goditur nga protestat masive, vitet e fundit.
Një pakt i mbrojtjes SHBA-Saudite i lidhur me vendosjen e marrëdhënieve diplomatike të Riadit me Izraelin, tani në fazat e tij përfundimtare të negociatave, përbën një sfidë të rëndësishme edhe për Khamenei.
Kjo aleancë kërcënon të ndryshojë ekuilibrin rajonal të fuqisë duke krijuar një front më të unifikuar kundër Iranit, duke ndikuar në pozicionin dhe strategjinë e tij gjeopolitike në Lindjen e Mesme.
/ rtsh.al /
