Përpjekja e parë e Neuralink për të implantuar çipin e tij në kafkën e një qenieje njerëzore hasi një pengesë të papritur pasi pajisja filloi të shkëputej nga truri i pacientit.
Pacienti, Noland Arbaugh, iu nënshtrua një operacioni në shkurt për të lidhur një çip Neuralink në trurin e tij, por funksionaliteti i pajisjes filloi të ulet brenda muajit pas implantimit të tij. Disa nga fijet e pajisjes, që lidhin kompjuterin në miniaturë me trurin, kishin filluar të tërhiqeshin. Neuralink nuk zbuloi pse pajisja u tërhoq pjesërisht nga truri i Arbaugh, por deklaroi në një postim se inxhinierët e saj kishin rafinuar implantin dhe kishin rivendosur funksionalitetin.
Aftësitë e pakësuara nuk dukej se e rrezikonin Arbaugh dhe ai ende mund ta përdorte implantin për të luajtur një lojë shahu në një kompjuter duke përdorur mendimet e tij.
Implanti i Arbaugh filloi të kishte probleme në fund të shkurtit, kur një numër i pazbuluar i fijeve të çipit "u tërhoqën nga truri, duke rezultuar në një rënie të numrit të elektrodave efektive". Kjo uli bit-et e pajisjes për sekondë, që në thelb është një matës se sa mirë mund të kryejë implanti detyrat e tij.
Neuralink, të cilin Elon Musk e zotëron dhe që u vlerësua në rreth 5 miliardë dollarë vitin e kaluar, ka mbrojtur gjerësisht suksesin e implantit të saj të parë, duke e pozicionuar veten si një lider botëror në teknologjinë e çipeve të trurit. Megjithëse pajisja është ende në fazat e hershme, zbulimi i kompanisë sjell më shumë vëmendje ndaj natyrës së patestuar dhe të komplikuar të procedurës eksperimentale./ The Guardian
/rtsh.al/
