Presidenti i SHBA, Donald Trump thotë se modeli kinez i inteligjencës artificiale me kosto të ulët DeepSeek është një thirrje zgjimi për firmat amerikane, pasi lëshimi i atij programi tronditi tregjet e aksioneve dhe nxiti debate mbi konkurrencën ekonomike dhe gjeopolitike ndërmjet Shteteve të Bashkuara dhe Kinës në zhvillimin e teknologjisë së inteligjencës artificiale.
"Shpresojmë që prezantimi i inteligjencës artificiale DeepSeek nga kompania kineze të jetë një thirrje zgjimi për industritë amerikane. Ne duhet të jemi të përqendruar për të konkurruar dhe fituar" - tha Trump nga Majemi.
Ai theksoi se nuk ishte i shqetësuar për këtë çështje, duke shtuar se “SHBA do të mbetet një lojtar dominues në këtë fushë”.
Ajo që ka tronditur këtë industri është pretendimi i DeepSeek se modeli i tij R1 është bërë me kosto më të ulët se programi rival i tij Chat GPT.
DeepSeek është bërë aplikacioni falas më i shkarkuar në SHBA vetëm një javë pasi u prezantua.
Kompania u themelua në vitin 2023 nga 40-vjeçari Liang Wenfeng në Hangzhou, një qytet në Kinën juglindore.
Ndërkohë lidhur me TikTok, presidenti amerikan tha se Microsoft është në diskutime për të blerë aplikacionin e medias sociale, ndërsa ai do të donte të shihte një "lumë ofertash" pasi ka interes të madh nga disa kompani për blerjen e tij.
Lidhur me mbrojtjen, Trump tha gjithashtu se do të nënshkruajë një urdhër ekzekutiv për të filluar ndërtimin e një sistemi të mbrojtjes ajrore "Iron Dome" për Shtetet e Bashkuara, si ai që Izraeli ka përdorur për të kapur mijëra raketa.
/rtsh.al/
