Ambasadori amerikan në Prishtinë, Xhefri (Jeffrey) Hovenier ka deklaruar se ka zotime nga ana e Kosovës për të shtyrë përpara asociacionin e komunave me shumicë serbe.
Duke u ndalur te sulmet në Banjskë më 24 shtator, ku mbeti i vrarë polici Afrim Bunjaku, Hovenier u shpreh se kjo ngjarje e bëri të qartë se sa urgjente është ecja përpara me zbatimin e plotë të marrëveshjes mes Beogradit dhe Prishtinës të arritur në shkurt në Bruksel dhe aneksit zbatues të arritur në mars në Ohër.
“Unë mendoj se 24 shtatori nënvizoi dhe e bëri shumë të qartë se sa urgjente është që të lëvizet para me këtë punë të rëndësishme që të arrihet implementimi i plotë nga të dyja palët, për të gjitha zotimet në marrëveshjen bazë dhe aneksin e implementimit. Ka shumë angazhime të mira në këtë marrëveshje themelore. Ato përfshijnë gjëra si shmangja e përdorimit të forcës, zgjidhja e probleme përmes mënyra paqësore, respekt për kufijtë e njëri-tjetrit. Ka zotime edhe në anën e Kosovës, lidhur me shtyrjen përpara të asociacionit të komunave me shumicë serbe, si një mjet për të adresuar shqetësimet e komunitetit etnik serb këtu. Ne po ashtu mendojmë se kjo është shumë e rëndësishme dhe urgjente”, tha Hovenier.
Ky i fundit paralajmëroi një vizitë të rëndësishme në Kosovë, për të cilën thotë se është reflektim i seriozitetit me të cilin SHBA-të dhe partnerët evropianë në BE e shohin situatën aktuale.
“Një vizitë shumë e rëndësishme do të bëhet, ashtu siç kemi diskutuar, dhe mendoj se është reflektim i seriozitetit me të cilin Shtetet e Bashkuara dhe partnerët tanë evropianë në BE e shohin situatën aktuale. Ne duam të shohim progres të vërtetë. Jo në negocimin e zotimeve të reja ndërmjet Kosovës dhe Serbisë, por të shohim që marrëveshja e arritur në shkurt dhe implementimi i aneksit në mars, të zbatohen plotësisht nga të dyja palët. Mendoj se kjo vizitë e radhës do të jetë manifestim i rëndësisë që kjo të realizohet”, tha Hovenier.
/rtsh.al/
