Presidenti serb Aleksandar Vuçiç konfirmoi se ka pranuar ftesën e liderit rus Vladimir Putin për të marrë pjesë majin e ardhshëm në festimet për të shënuar 80-vjetorin e fitores në Luftën e Dytë Botërore.
“Nëse nuk vjen fundi i botës, ndonëse nuk jam i sigurt, por shpresoj që nuk do të ndodhë, do të ishte nder i madh për mua që të jem në Sheshin e Kuq për përvjetorin e 80-të të çlirimit nga fashizmi. 9 Maji është ende shumë larg. Por unë do të doja të falënderoja presidentin Putin për ftesën. I thashë se, nëse nuk ndodh ndonjë gjë, do të jem i lumtur të marr pjesë në ato festime,” deklaroi z. Vuçiç.
Kremlini tha të martën se synon që më 9 maj 2025 të mbajë festimet më të mëdha në histori, ndërsa tenton të çojë përpara vlerat patriotike dhe ushtarake.
Kreu i shtetit serb paralajmëroi gjithashtu për rrezikun e përdorimit të armëve bërthamore nga presidenti rus Vladimir Putin.
“Disa njerëz që nuk e njohin Vladimir Putinin thonë: 'Jo, ai nuk do ta bëjë këtë”, por nëse Moska do të kërcënohej, unë e njoh mjaft mirë presidentin rus për të thënë se ai nuk do të hezitonte të përdorte armë bërthamore,” u shpreh presidenti serb.
Në fjalimin drejtuar popullit serb, Vuçiç paralajmëroi dorëheqje të tjera të zyrtarëve qeveritarë lidhur me tragjedinë që ndodhi në Novi Sad më 1 nëntor, kur tarraca e betonit të stacionit të trenit u shemb dhe i mori jetën 15 personave. Ai u shpreh se përgjegjësia për një ngjarje kaq të rëndë nuk mund të shmanget.
Gazetare: Vjollca Zharri
/rtsh.al/
