Gjermania thuhet se ka pezulluar lejet për të eksportuar armë në Izrael.
Gjermania ka ndalur eksportet e reja të armëve të luftës në Izrael, ndërkohë që merret me sfidat ligjore, sipas një analize të të dhënave të Reuters dhe një burimi të afërt me Ministrinë e Ekonomisë.
Nga vetë Izraeli ndërkaq nuk ka asnjë koment rreth këtij lajmi, teksa ministri i Mbrojtjes, Yoav Gallant, ka pasqyruar edhe planin e ri të Izraelit, i cili duket se do të përqendrohet në veri të vendit.
Vëmendja e Izraelit po zhvendoset nga Gaza në frontin verior dhe në kufirin me Libanin ndërsa fillon një “fazë e re” e luftës.
Kështu deklaroi ministri izraelit i Mbrojtjes, Yoav Gallant, duke iu drejtuar personelit të Forcave Ajrore izraelite në bazën ajrore Ramat David, që ndodhet jo shumë larg Haifës.
“Qendra e gravitetit po lëviz në veri. Ne po i devijojmë forcat, burimet dhe energjinë në veri,” tha ministri, sipas zyrës së tij.
“Unë besoj se jemi në fillimin e një faze të re të kësaj lufte dhe ne duhet të përshtatemi,” shtoi Gallant, duke përsëritur se qëllimet e Izraelit në veri janë “të qarta dhe të thjeshta: t’i kthejë banorët në shtëpitë e tyre të sigurt”.
/rtsh.al/
