Egjipti ka denoncuar sulmet izraelite në sistemin e kujdesit shëndetësor të Gazës dhe ka kërkuar përgjegjësi në OKB. Sipas negociatorit egjiptian për arritjen e një marrëveshje, gjeneral-major Ahmed Abdel Khaleq ka theksuar se Izraeli vazhdon të kryejë krime, të mburret me to dhe të justifikojë veprimet e tij për shkak të mungesës së një pengese apo vendosmërie efektive nga komuniteti ndërkombëtar për të zbatuar rezolutat e OKB-së dhe për të ndaluar shkeljet e ligjit ndërkombëtar humanitar.
Ai shtoi se veprimet e Izraelit e kanë bërë sistematikisht Gazën të pabanueshme, duke e zhveshur atë nga nevojat themelore njerëzore përmes një sërë krimesh të përsëritura dhe të ndryshme, duke përfshirë shkatërrimin e sistemit të kujdesit shëndetësor, si pjesë e një politike të zhvendosjes së detyruar që synon fshirjen e kauzës palestineze.
Abdel Khaleq shprehu vlerësimin e Grupit Arab për përpjekjet ndërmjetësuese të Egjiptit dhe Katarit, me përfshirjen e SHBA-së, për të lehtësuar një armëpushim.
Ai nënvizoi nevojën që komuniteti ndërkombëtar të ndërmarrë veprime vendimtare, duke përfshirë ndalimin e politikave të zhvendosjes së detyruar, sigurimin e shpërndarjes së ndihmës humanitare, detyrimin e Izraelit që të pajtohet me rezolutat ndërkombëtare dhe sigurimin e mbrojtjes për civilët dhe punonjësit e kujdesit shëndetësor.
Abdel Khaleq bëri thirrje për masa të menjëhershme për të ndaluar eksportet e armëve në Izrael, duke e mbajtur atë përgjegjës për krimet e tij dhe duke siguruar mbrojtjen e civilëve dhe objekteve mjekësore në përputhje me konventat ndërkombëtare.
Ai kritikoi standardet e dyfishta të aplikuara për Gazën në krahasim me rajonet e tjera dhe theksoi se veprimet e Izraelit nuk do t'i detyrojnë palestinezët të braktisin tokën e tyre ose t'i detyrojnë arabët dhe kombet paqedashëse të braktisin kauzën palestineze.
Në përfundim të deklaratës së tij, Abdel Khaleq pohoi se, pavarësisht agresionit izraelit, populli palestinez në mënyrë të pashmangshme do të arrijë shtetin e tij të pavarur me Jerusalemin Lindor si kryeqytet.
/rtsh.al/
