Dhunohet avokati i ish-kryeministrit Sali Berisha, Sokol Mëngjesi. Ngjarja ka ndodhur mëngjesin e sotëm (29 maj) në zonën e ish-Bllokut në Tiranë, ku persona ende të paidentifikuar kanë goditur avokatin e Berishës.
Mëngjesi është dërguar në spital, ndërsa policia po punon për identifikimin dhe kapjen e autorëve.
Sipas informacioneve siguruar nga RTSH, bëhet me dije se kanë qenë tre persona të cilët e kanë goditur avokatin.
“Sot, rreth orës 08:50, në zonën e ish-Bllokut në Tiranë, persona ende të paidentifikuar kanë goditur shtetasin S. M., me profesion avokat.
I dëmtuari është dërguar menjëherë në spital për dhënien e ndihmës mjekësore dhe ndodhet nën kujdesin e mjekëve.
Gjendja e tij shëndetësore është normale.
Drejtoria Vendore e Policisë Tiranë dhe strukturat e Policisë së Shtetit janë angazhuar për identifikimin dhe kapjen e autorëve”, thuhet në njoftim.
/rtsh.al/
