Eurodeputeti i Demokracisë së Re, Fredi Beleri do të ketë një takim me kryeministrin shqiptar Edi Rama me rastin e serisë së takimeve të tij në Tiranë, ku ndodhet Komiteti Ndërparlamentar i Ndërlidhjes Shqipëri-BE.
Duke folur për ERTNews, eurodeputeti Fredi Beleri ka akuzuar kryeministrin shqiptar Edi Rama se përmes procedurave nuk e la që të përfaqësonte qytetaret e Himarës.
“Sigurisht që është shumë e trishtueshme dhe nuk do të harroj që me procedura nuk më la të përfaqësoja qytetarët e Himarës që më bënë kryetar bashkie. Nuk do ta harroj kurrë këtë, por tani siç e dini me lëvizjen e kryeministrit më përdorin si kandidat dhe me besimin e qytetarëve grekë jam deputet në Parlamentin Europian”, tha Beleri.
Beleri tha se gjatë takimit do të mbrojë të drejtat e pakicave, ku sipas tij Shqipëria nuk i ka respektuar sipas konventave ndërkombëtare.
“Ne do të kemi një sërë takimesh në Tiranë dhe në orar është edhe një takim me zotin Rama. Është hera e parë që nga bindja ime dhe aventura ime që do ta takoj, nëse takimi ndodh. Ai mund të dërgojë një nga bashkëpunëtorët e tij. Kushdo që të vijë dhe në të gjitha takimet që do të kemi këtu unë do të shpreh qëndrimet tona që janë e drejta e pakicës sindikaliste për vetëvendosje, pronë, gjuhë dhe arsimim në të gjitha nivelet dhe të gjitha këto të drejta, të cilat i shkelin konventat ndërkombëtare. I ka firmosur edhe Shqipëria dhe fatkeqësisht nuk janë respektuar deri më sot”, tha Beleri.
Duke folur për integrimin e Ballkanit Perëndimor, eurodeputeti Beleri tha se Greqia është e vendosur të bashkëpunojë me vendet për të ecur para, por sipas tij edhe Shqipëria duhet të bëjë pjesën e saj.
“Greqia është e vendosur në politikën e saj dhe me të drejtë për integrimin e Ballkanit Perëndimor në Bashkimin Evropian. Çështja është se çfarë do të bëjë Shqipëria. Topi është tashmë në fushën e Shqipërisë. Nëse zoti Rama dhe administrata shqiptare duan Europën, shtëpia jonë e përbashkët ka rregulla dhe ato duhen respektuar”, theksoi ai.
Fredi Beleri u dënua me 2 vite burg për blerje votash në zgjedhjet vendore të 2023, ndërsa kandidonte për Bashkinë Himarë. Nga zgjedhjet Beleri doli fitues por për shkak të dënimit të tij nuk u lejua që të betohej si kryetar bashkie. Kjo solli përplasje mes Shqipërisë dhe Greqisë, ku kjo e fundit vendosi që ta bënte eurodeputet të saj në Parlamentin Evropian.
/rtsh.al/
